समाचारहरू

उत्तरी गोरखामा पुस १६ गते साँझबाट हिमपात भएको छ । पुस १७ गते दिनभर हिउँ परिरहेको सामागाउँ-५ का मिङमार लामाले जानकारी दिए । आज साँझ सम्म एक इञ्च हिउँ जमिसकेको उनले बताए । 'आगो तापेर घर भित्रै बसेका छौँ ।'-उनले टेलिफोनमा भने । छेकम्पार गाविसमा पनि पुस १६ गते साँझदेखि हिमपात भएको छ ।

बारपाक र लाप्राक गाविसमा भने पुस १७ गते असिना पानी परेको छ । असिना पानी परेपछि टेण्ट र टहरोमा बसेका भूकम्प पीडितहरू समस्यामा परेका छन् । 'एक्कासी असिना पानी पर्‍यो । अहिले चिसो बढेको छ ।'-बारपाकका स्थानीय ओमबहादुर घलेले भने-'टहरो र टेण्टमाथि असिना जमेको छ, भूकम्प पछि बनाइएका टहरा र टेण्टमा असिना जमेपछि अहिले फाल्न थालेका छौँ ।'

चिसो बढेसँगै लाप्राकका स्थानीयहरू पुरानै बस्तीमा फर्किएका छन् । अहिले बस्दै आएको गुप्सीपाखामा एकीकृत बस्ती निर्माणको काम पनि सुरु भएको र गुप्सीपाखा उच्च ठाउँमा भएकाले पुरानै बस्तीमा फर्किएको स्थानीय राज गुरुङले जानकारी दिए ।

पहिलो किस्ताको रकम पाएपनि घर बनाउन रकम अभाव भएको भन्दै धेरैजसो भूकम्प पीडितहरूले घर निर्माण सुरु गरेका छैनन् । जाडो बढेसँगै टहरो र टेण्टमा बस्दै आएका भूकम्प पीडतको बिचल्ली भएको स्थानीयबासीले जनाएका छन् ।

हरिराम उप्रेती