समाचारहरू

सशस्त्र द्वन्द्वका समयमा बेपत्ता पारिएका व्यक्तिका परिवारलाई बेपत्ता पारिएका व्यक्तिको छानबिन आयोगले बेपत्ता व्यक्तिको अन्तिम प्रमाण पेश गर्न चिठ्ठी पठाएको छ । आयोगले १५ दिन भित्र बेपत्ता भएको व्यक्तिको बेपत्ता हुनु अघिको अन्तिम अवस्थाका बारेमा खुलाउन र आफूसँग भएका थप प्रमाणहरू पेश गर्न उल्लेख गर्दै पत्र पठाएको हो ।

आयोगले पठाएको पत्र आफूले मङ्सिर १७ गते पाएको तत्कालीन विद्रोही माओवादी पक्षबाट बेपत्ता पारिएका पुवा मझुवाका अगम राईका दाजु डिल्लीप्रसाद राईले जानकारी दिए । राई ०६० सालदेखि बेपत्ता पारिएका हुन् । 'त्यसबेला पत्रकार सम्मेलन गरेर सार्वजनिक गरिएको थियो । ती समाचारहरू पत्रपत्रिकामा आएका थिए । अहिले ती प्रमाणहरू आफू सँग छैनन् । कसरी प्रमाण जुटाउने भन्ने समस्या भएको छ ।' डिल्लीप्रसादले भने ।

०६१ असोज १८ गते फिदिमबाट बेपत्ता पारिएका मिलन राईको परिवारलाई पनि आयोगको पत्र आइपुगेको छ । अन्तिम अवस्थाको प्रमाण पेश गर्न भनिएकाले आफू अलमलमा परेको मिलनकी पत्नी आइतरानीले बताइन् । इलाम नगरपालिका-५ भन्ज्याङमा बस्दै आएकी आइतरानीले इलामबाटै शान्ति समिति मार्फत आयोगमा उजुरी पेश गरेकी थिइन् । 'आयोगले चिठ्ठी पठाएको रहेछ । अन्तिम प्रमाण पेश गर्न भनेको छ । के पेश गर्ने ? मसँग अहिले केही प्रमाण छैन ।'-आइतरानीले भनिन्-'अब शान्ति समितिमै गएर सोधेर मात्र पठाउने सोच गरेकी छु ।'

बेपत्ता पारिएका व्यक्तिको छानबिन आयोगमा इलामबाट २३ जनाको उजुरी दर्ता भएको छ । तीमध्ये धेरै जनाको परिवारका हातमा पत्र पुगिसकेको स्थानीय शान्ति समितिका सचिव डिकेन्द्र इदिङ्गोले जानकारी दिए । तर, अहिले सम्म कसैले पनि अन्तिम प्रमाण पेश गरिनसकेको उनले बताए । अन्तिम प्रमाण के कुरालाई मान्ने भन्ने विषयमा बेपत्ता परिवार अलमलमा परेको द्वन्द्व पीडित समाज इलामका संयोजक दामोदर चापागाईंले बताए ।

कोकिला ढकाल