समाचारहरू

रामेछापको इलाका प्रशासन कार्यालय प्रिति लाप्चानेको सेवा एक महिनादेखि बन्द हुँदा स्थानीय सेवाग्राही सेवाबाट वञ्चित भएका छन् । इलाका प्रशासन कार्यालयमा सरकारले अधिकृत स्तरको कर्मचारी नखटाउँदा इलाका प्रशासन कार्यालये दिने सम्पूर्ण सेवा एक महिनादेखि बन्द भएको हो ।

जिल्लाका आठ ओटा गाविसका स्थानीयलाई सेवा प्रवाह गर्ने उद्देश्यले स्थापना गरिएको सो कार्यालय ०७३ साउन महिनामा स्थापना गरिएको थियो । जिल्ला प्रशासन कार्यालयका नासु मकरध्वज खड्कालाई कायमुकायम अधिकृत तोकि सो कार्यालय स्थापना गरिएको थियो ।

कायम मुकायम तोकिएको कर्मचारीले ६ महिनाभन्दा बढी कामु भएर काम गर्न नपाउने कानुनी बाध्यताका कारण खड्काको कामु शाखा अधिकृतको अवधि मङ्सिर महिनामा सकिएपछि उनी जिल्ला प्रशासन कार्यालय रामेछापमा फर्किएका छन् । सो स्थानमा गृहमन्त्रालयले अन्य अधिकृत स्तरको कर्मचारी नखटाएको कारण कार्यालयको काम एक महिनादेखि ठप्प छ ।

इलाका प्रशासन कार्यालयले नेपाली नागरिकताको प्रमाणपत्र, राहदानी, नता प्रमाणितलगायतका कागजातहरू जारी गर्ने गर्दछ । सो कार्य शाखा अधिकृतभन्दा तलको कर्मचारीले गर्न नमिल्ने भएपछि कार्यालयका अन्य कर्मचारीसमेत जिल्ला प्रशासन कार्यालय मन्थलीमा नै हाजिर भएर काम गरि रहेका छन् ।

कार्यालय सहयोगीले कार्यालय खोल्ने काम बहेक सेवा प्रवाहका कुनै पनि काम हुन नसकेका स्थानीइले गुनासो गरेका छन् । सो कार्यालयमा अधिकृत स्तरको कर्मचारीको व्यवस्थापनको लागि जिल्ला प्रशासन कार्यालयले माथिल्लो निकायमा ताकेता गरिरहेको रामेछापका प्रमुख जिल्ला अधिकारी प्रकाशचन्द्र अधिकारीले जानकारी दिए ।

नवराज पथिक