समाचारहरू

दुर्गमका नागरिकलाई सेवा दिन स्थापना गरिएको इलाका प्रशासन कार्यालय, लाप्चानेमा कर्मचारी नगएको कारण ६ वर्षदेखि कार्यालय नखुल्दा स्थानीय नागरिक मर्कामा परेका छन् ।

सो कार्यालयका कर्मचारी जिल्ला प्रशासन कार्यालयमा बसेर काम गरिरहेका छन् । जिल्लाको उत्तरी भेगको उमाकुण्ड र गोकुलगङ्गा गाउँपालिकाका नागरिक नागरिकता लगायतका कागजात बनाउन एक दिनको जोखिमपूर्ण यात्रा गरेर सदरमुकाम जान्छन् ।

त्यसरी काम लिएर सदरमुकाम जाँदा जोखिमपूर्ण यात्रा मात्र होइन सर्वसाधारणको खर्च पनि त्यतिकै हुने स्थानीय मणिराज सुनुवारले बताउनु भयो । 'उमाकुण्डको गुम्देलबाट मन्थली आएको गाडी भाडा मात्रै २ हजार रुपियाँ लाग्छ, आउँदा जाँदा गाडी भाडा ४ हजार रुपियाँ लाग्छ, आउन एक दिन, काम गर्न एक दिन फर्कन एक दिन गर्दा तीन दिन खर्च हुन्छ । आउने, जाने, खाने र बस्ने खर्च जोड्दा नागरिकताको काममा आउँदा एक जनाको १० हजार रुपियाँ खर्च हुन्छ । गाउँमा नै भए त्यो खर्च केही जोगिने थियो', सुनुवारले भन्नुभयो ।

जिल्लाको उत्तरी भेगका सेवाग्राहीलाई सेवा दिन २०७३ सालमा हालको उमाकुण्ड गाउँपालिकाको लाप्चानेमा इलाका प्रशासन कार्यालय स्थापना गरिएको थियो । स्थापना गरेको करिब एक वर्ष कार्यालय चले पनि त्यसपछि सो कार्यालयमा ताला लागेको छ ।

देश सङ्घीय संरचनामा नजाँदै स्थापना गरिएको कार्यालय सङ्घीय संरचना सुरु भएपछि अपायकमा परेको कारण सेवाग्राही कम आएका भन्दै कर्मचारी जान नमानेको स्थानीय सुनुवारले जानकारी दिनुभयो । गाउँपालिकाको केन्द्र प्रीतिकै च्यादोलुमा चहलपहल बढ्यो तर लाप्चाने सुनसान भयो ।

गाउँपालिकाले स्थानीय तहको केन्द्रमा नै इलाका प्रशासन कार्यालय सारिदिन पटक पटक अनुरोध गरेपनि सरकारले सुनुवाइ गरेन । मन्त्रीस्तरको निर्णयबाट सारिनु पर्ने सो कार्यालय सार्न केन्द्र सरकारले कुनै चासो नदिएको उमाकुण्ड गाउँपालिका अध्यक्ष शेरबहादुर सुनुवारले बताउनु भयो । गाउँपालिकाको गाउँ सभाले इलाका प्रशासन कार्यालय तथा मालपोत र नापी कार्यालयको शाखा समेत गाउँपालिका केन्द्रमा राखिदिन अनुरोध गर्ने सिफारिसका साथ निर्णय गरेपनि केन्द्र सरकार मौन रहेको अध्यक्ष सुनुवारले जानकारी दिनुभयो ।

ती कार्यालयको लागि गाउँपालिकाले आवश्यक संरचना समेत तयार गरेर राखेको छ । 'ती कार्यालयको लागि गाउँपालिकाले छुट्टै भवन नै बनाएर राखेको छ, तर केन्द्र सरकार मान्दै मान्दैन, नागरिक हामीलाई कराउँछन्, केन्द्र सरकार टेर्दैन', गाउँपालिका अध्यक्ष शेरबहादुर सुनुवारले गुनासो गर्नुभयो ।

सो विषयमा क्याबिनेटमा सिफारिस गरिदिन गाउँपालिकाको निर्णय सहित अध्यक्ष सुनुवार जिल्ला प्रशासन कार्यालयमा पनि पुग्नुभयो । उहाँ सो कार्यालयमा पुगेपछि प्रमुख जिल्ला अधिकारी अनिता निरौलाले सर्वदलीय र सर्वपक्षीय बैठक बोलाउनु भयो । बैठकमा अधिकांश सहभागीले गाउँपालिकाको केन्द्रमा नै इलाका प्रशासन कार्यालय राख्नु उचित हुने सुझाव दिनुभयो । तर केही सहभागीले सोही गाउँपालिकाको बाम्ती भण्डारमा कार्यालय राख्न सुझाव दिनुभयो ।

बाम्तीमा कार्यालय नराख्ने हो भने थप तयारी सहित छलफल गर्नुपर्ने उहाँहरूले प्रस्ताव राखेपछि थप तयारी सहित निष्कर्षमा पुग्नु पर्ने भन्दै छलफलको लागि जिल्ला प्रशासन कार्यालयले समय दिएको छ । 'उहाँहरूले समय माग्नु भएको छ, त्यसपछि फेरी बैठक बसेको छैन, साउनको १५ भित्र बैठक बसेर एउटा निचोडमा पुग्छौँ', प्रमुख जिल्ला अधिकारी निरौलाले भन्नुभयो ।

कार्यालय अहिलेकै ठाउँ, गाउँपालिका केन्द्र वा बाम्ती जहाँ राखे पनि तत्काल सञ्चालनमा आउनु पर्ने गाउँपालिका अध्यक्ष सुनुवारको माग छ । 'गाउँपालिका केन्द्रमा राख्ने हो भने आवश्यक संरचना बनाइसकेको छ, अन्य ठाउँमा राख्ने भए पनि संरचना बनाउनु पर्‍यो, गाउँपालिकाले आवश्यक सहयोग गर्छ तर कार्यालय भने तत्काल सञ्चालन हुनु पर्‍यो', सुनुवारले भन्नुभयो ।

इलाका प्रशासन कार्यालयका अधिकृत अहिले सरुवा भएर जानुभएकोले उहाँ नआउँदासम्म कार्यालय सञ्चालन गर्न नसकिने प्रमुख जिल्ला अधिकारी निरौलाले बताउनु भयो । त्यति बेलासम्म राजनीतिक सहमति गरेर ठाउँ पनि निश्चित गरी कार्यालय स्थापनाको लागि सिफारिस गरेर गृह मन्त्रालयमा पठाउने उहाँले बताउनु भयो ।

नवराज घिमिरे