समाचारहरू

इलाका प्रशासन कार्यालय नराकोट सिञ्जा जुम्लाको सेवा प्रवाह ठप्प भएको भन्दै सिञ्जा भेगका ११ गाविसका स्थानीयबासीले क्षेत्रीय प्रशासक कृष्ण देवकोटालाई ध्यानाकर्षण पत्रमार्फत सेवा पुनः सुचारूका लागि माग गरेका छन् ।

क्षेत्रीय प्रशासक प्रमुख जुम्ला आएको अवसरमा सिञ्जाबासीले कात्तिक ५ गते इलाका प्रशासन कार्यालयद्वारा वितरण हुने सेवा प्रवाह ठप्प भएको भन्दै ध्यानाकर्षण पत्र बुझाएका हुन् ।

नेपाल सरकारद्वारा नागरिकलाई घर पायकमै सेवा दिने उद्देश्य अनुरूप ०७३ असार १७ गतेदेखि आफ्नो सेवा प्रवाह सुरू गरेको इलाका प्रशासन कार्यालयद्वारा गत असोज ६ गतेदेखि सबै सेवा प्रवाह ठप्प पारेको ध्यानाकर्षण पत्रमा उल्लेख गरिएको छ ।

इलाका प्रशासन कार्यालय नराकोट सिञ्जामा काजमा रहेका सहायक प्रमुख जिल्ला अधिकारी सुमन धितालको असोज ६ गते देखि काज सकिएर घर बिदामा बसेका कारण सो समयदेखि कार्यालयद्वारा कुनै पनि सेवा प्रवाह नभएको सिञ्जाबासीको भनाइ छ ।

सिञ्जा क्षेत्रका ११ गाविसलाइ सेवा दिने लक्ष्यका साथ स्थापना गरिएको इलाका प्रशासन कार्यालयको सेवा प्रवाह रोकिएपछि सिञ्जाबासीले पुनः सेवा लिन सदरमुकाम धाउनु परेको ध्यानाकर्षण पत्रमा जनाइएको छ ।

प्रमुख जिल्ला अधिकारी रूद्रप्रसाद पण्डितले जिल्ला प्रशासन कार्यालय जुम्लामा छुट्टै इलाका प्रशासन फाँट स्थापना गरी सिञ्जाबासीका लागि सेवा प्रवाह भइरहेको जानकारी दिँदै इलाकाबाटै सेवा प्रवाहका लागि कर्मचारीको ब्यवस्था छिट्टै गर्ने प्रतिवद्धता व्यक्त गरे ।

क्षेत्रीय प्रशासक कृष्ण देवकोटाले लोकसेवा आयोगमा कर्मचारी दरबन्दीको माग गरिएको बताउँदै समस्याको समाधान छिट्टै खोजिने आश्वासन दिए ।

मानदत्त रावल