समाचारहरू

इन्सेक कर्णाली प्रदेश कार्यालय, सुर्खेत र मानव अधिकार आयोगको कर्णाली प्रदेश कार्यालयले ०८० चैत ३० गते जिल्ला कारागार संयुक्त रुपमा अनुगमन गरेको छ ।

अनुगमनमा कारागारको भौतिक अवस्था, खाना, सिधा तथा आरामको अवस्था, स्वास्थ्य जाँच उपचार, पुस्तकालय तथा मनोरञ्जन, भेटघाटको प्रवन्ध, खानेपानी र अभिलेख लगायतका विषयमा अनुगमन गरिएको इन्सेकले जनाएको छ ।

अनुगमनका क्रममा पुरुष कैदीबन्दीतर्फ कारागारमा कैदीबन्दी बिरामी हुँदा छिट्टै उपचार गर्ने व्यवस्था नभएको एक कैदीबन्दीले गुनासो गरे । त्यसैगरी,खानेपानीको समस्या रहेको बताउनु भयो । उहाँले भन्नु भयो ‘ खानेपानीको लागि धाराको व्यवस्था तथा सिपमुलक तालिमको व्यवस्था भए राम्रो हुन्थ्यो।’

यसैगरी , कारागार धेरै कैदीबन्दी रहेको हुँदा एउटै कोठामा ५२ जना सम्म सुत्नु परेको अर्का एक कैदीकन्दीले बताउनु भयो । कारागारमा पाँच ओटा भित्र र तीन ओटा बाहिर शौचालय भएको तर पनि प्रयोगमा पालो कुर्नुपर्ने, खेलकुदको समाग्री प्रशस्त भएपनि खेल्ने ठाउँको अभाव रहेको उहाँले बताउनु भयाे  ।

यसैगरी महिला कैदी बन्दीमा पर्याप्त मात्रामा सिपमुलक तालिम सञ्चालन भएको तर बजारीकरणमा  समस्या रहेको, महिला बन्दी गृहमा पुस्तकालय नरहेको ,पानीको शुद्धिकरण गर्ने व्यवस्था नरहेको , विद्युत् नहुँदा समस्या हुने गरेको लगायतको समस्या रहेको एक महिला कैदीबन्दीले बताउनु भयो ।

करागारमा एक सय जनाको क्षमता रहेको कारागारमा अनुगमनका क्रममा ४ सय ११ जना कैदी बन्दी रहेका छन । जस अनुसार पुरुषतर्फ ३ सय ७४ जना कैदी तथा थुनुवा रहेका छन भने महिलातर्फ ३७ जना कैदीबन्दी रहेका छन् । यसैगरी कारागारमा १ जना आश्रित बालिका रहेको कारागार प्रशासक लक्ष्मी खरेलले जानकारी दिनु भएको छ ।

हप्तामा ४ दिन आफन्त सँग भेटघाट गर्ने प्रवन्धको व्यवस्था गरिएको छ । स्वास्थ्यकर्मीको दरबन्दी भएपनि हाजिर नहुँदा समस्या हुने गरेको छ । कैदीबन्दी बिरामी हुँदा जिल्ला स्वास्थ्य कार्यालय सँग समन्वय गरेर उपचार हुन्छ । सञ्चारको लागि आठ ओटा सेट उपलब्ध रहेको छ । पुस्तकालयमा ३५०० ओटा किताबहरु प्रवन्ध गरिएको छ । खानेपानी समस्यको समाधानका सम्बन्धित निकायसँग छलफल भइरहेको कारागार प्रशासक खरेलले बताउनुभयो ।

अनुगमनमा राष्ट्रिय मानव अधिकार आयोगका प्रमुख लोकनाथ बास्तोला, मानव अधिकार अधिकृत मानबहादुर कार्की, इन्सेकका प्रदेश संयोजक नारायण सुवेदी र प्रलेख अधिकृत पुरनप्रसाद चौधरी रहनु भएको थियो ।

इन्सेक कर्णाली प्रदेश कार्यालय, सुर्खेत