समाचारहरू

अनौपचारिक क्षेत्र सेवा केन्द्र (इन्सेक) मधेस प्रदेश कार्यालय जनकपुरले चैत ३ गते बलात्कार घटनाको स्थलगत अनुगमन गरेको छ ।

इन्सेक मधेस प्रदेश संयोजक राजु पासवानको नेतृत्वमा दलित जनकल्याण युवा क्लबका कार्यकारी निर्देशक बिनोदकुमार विसुन्के, ओरेककी संयोजक अनिता चौधरी, महिला मानव अधिकार रक्षक सञ्जाल सिरहाकी अध्यक्ष गङ्गा कुमारी अधिकारी, सिकाइ सञ्जालकी प्रदेश संयोजक रेणु कर्ण र इन्सेक सिरहा जिल्ला प्रतिनिधि दुर्गा परियारले घटनाको संयुक्त अनुगमन गरेको हो ।

अनुगमनका क्रममा बलात्कार घटनाबाट पीडित सुस्त तथा अपाङ्गता भएकी पीडित ३५ वर्षीया महिलाको आठ महिनाको गर्भ रहेको र आर्थिक अवस्था कमजोर रहेको पाइएको थियो ।

पीडित महिलाले स्थानीय उप स्वास्थ्य चौकीबाट आइरन चक्की र खोप लगाएको भए पनि खोप कार्ड चौकीका प्रमुखले नबनाइ दिएको जानकारी गराएपछि अनुगमन टोलीको पहलमा तत्कालै चौकीका प्रमुख संजयकुमार साहले खोप कार्ड बनाइ दिएको र नियमित गर्भावस्था जाँच गरी औषधि दिने प्रतिबद्धता जाहेर गर्नुभएको थियो ।

इन्सेक मधेस प्रदेश संयोजक राजु पासवानले अनुगमनबाट पीडितको आर्थिक र स्वास्थ्य अवस्था कमजोर भएकोले इन्सेकले प्रदान गर्ने हिंसा पीडित कोषबाट आर्थिक सहयोग गर्ने प्रतिबद्धता गर्नुभएको थियो ।

पीडित महिलालाई ०७९ साउन २८ गते सुखिपुर नगरपालिका–३ का २० वर्षीय चन्दन यादवले बलात्कार गरेको आरोपमा पीडित पक्षले इलाका प्रहरी कार्यालय महेशपुर पतारमा पुस १ गते उजुरी दिनुभएको थियो ।

पीडित महिलाको स्वास्थ्य परीक्षण प्रादेशिक अस्पताल सिरहामा पुस १ गते भएको र थप जाँच पुस २ गते पनि भएको थियो । इलाका प्रहरी कार्यालय महेशपुर पतारका इन्सपेक्टर केशव कटुवालले घटनाका आरोपित फरार रहेकोले खोज तलास भइरहेकोे बताउनु भयो ।

दुर्गा परियार