समाचारहरू

अनौपचारिक क्षेत्र सेवा केन्द्र (इन्सेक) मधेस प्रदेश कार्यालयले १८ वर्षीया बालिकामाथि भएको बलात्कार घटनाको अनुगमन ०८१ भदौ २४ गते गरेको छ ।

घटनाको अनुगमन इन्सेक मधेस प्रदेशका संयोजक राजु पासवानको नेतृत्वमा एडभोकेसी फोरम, नेपाल, राजकुमार महासेठ, इन्सेक महोत्तरी जिल्ला प्रतिनिधि ममता विश्वकर्मा, पत्रकार रञ्जन भण्डारी सहितको टोलिले गर्नु भयो ।

अनुगमनको क्रममा पीडित बालिकाको स्वास्थ्य अवस्था बारे बुझ्नका लागि प्रादेशिक अस्पताल जलेश्वर पुग्नु भएको टोलीले अस्पतालका अध्यक्ष मिनु झा, ओसिएमसिका इन्चार्ज रिङ्कु साह र प्रहरी हवल्दार सुरेन्द्र ठाकुरसँग भेट्घाट गर्नु भयो । विजुलीको करेन्टका कारण पीडित बालिकाको बायाँ हातको औलाहरू जलेका छन् भने कान्छि औला काट्नु परेको अवस्था रहेको, बाँकी औलाहरूको अवस्था पनि सामान्य नरहेको, पाठेघरमा संक्रमण भई रक्तस्राव भएको पीडितकाे स्वास्थ्य उपचारमा खटिएका अस्पतालका नर्श बिना तिवारीले अनुगमन टोलीलाई जानकरी दिनु भएको इन्सेक मधेस प्रदेशका संयोजक राजु पासवानले बताउनु भयो ।

पीडित बालिकालाई रामगोपालपुर नगरपालिका-३ दोलाठीका ५० वर्षीय उमेश मण्डलले विभिन्न प्रलोभन देखाएर आफ्नो घरमा लगी साउन १८ गते बलात्कार गरेको भन्दै पीडितले भदौ १९ गते जिल्ला प्रहरी कार्यालय महोत्तरीमा उजुरी दिनु भएकाे छ । त्यसैबीच, पीडितको हात नजिकको टेबलमा रहेको विजुलीको नाङ्गो तारमा छुन पुग्दा करेन्ट लागि दाँया हातको औंलाहरू जलेको छ । सोही दिन आरोपितले पीडितलाई उपचारको लागि रामगोपालपुरस्थित प्राथमिक स्वास्थ्य केन्द्र लगेका थिए । उपचारको क्रममा प्रहरीलाई घटना शङ्कास्पद लाग्दा प्रहरीले युवतीलाई सोधपुछ गर्दा पीडितले घटनाबारे जानकारी दिएका थिए र लगतै आरोपितलाई गिरफ्तार गरेको जिल्ला प्रहरी कार्यालयका एसपी पोखरेलले बताउनु भयो । पीडितको स्वास्थ्य परीक्षण भदौ १८ गते प्रादेशिक अस्पताल जलेश्वरमा भएको छ ।

ममता विश्वकर्मा