समाचारहरू

इन्सेक गण्डकी प्रदेश कार्यालयद्वारा उपनिर्वाचन हुने तनहुँ क्षेत्र नम्बर १ को विभिन्न मतदान केन्द्रको पर्यवेक्षण गरेको छ ।

इन्सेक गण्डकी प्रदेशका संयोजक शिव खकुरेलको नेतृत्वको टोलीले वैशाख ८ गते जिल्ला सुरक्षा समितिले अति संवेदनशिल भनी तोकेको व्यास नगरपालिका– ८ को रिस्ती फेदी मतदान केन्द्र सहित व्यास नगरपालिका– ७ को क्यामिन मावि मतदान केन्द्र र व्यास नगरपालिका– ३ को महर्षी मावि मतदान केन्द्रको पर्यवेक्षण गरि मतदानको तयारी, सुरक्षाको अवस्था लगायतको विषयमा मतदान अधिकृत तथा राजनीतिक दलका प्रतिनिधिहरूसँग छलफल गरेको  छ ।

यसैगरि टोलीले प्रमुख जिल्ला अधिकारी छविलाल रिजाल तथा जिल्ला निर्वाचन अधिकारी हरिप्रसाद ढकालसँग पनि भेटगरि निर्वाचनको तयारी तथा शान्ति सुरक्षाको अवस्थाको बारेमा छलफल गरेको छ ।

मतदानको दिन पृथ्वीराजमार्गमा प्रहरी स्कर्टङिमा निश्चित समयमा सवारी सञ्चालन गरिने तर मतदान हुने तनहुँ क्षेत्र नम्बर १ को सिमाना मुग्लिङ्गदेखी दमौलीको मादीको पुलसम्म उक्त सवारी साधन कतै पनि रोकिन नपाउने गरि यातयात सञ्चालन गरिने प्रजिअ रिजालले बताउनु भयो ।

साथै सहायक राजमार्ग र भित्री सडकहरू पुर्णरूपमा बन्द गरिने छ । त्यस्तै परिचय पत्र लिएका सन्चारकर्मी, अनुमती पाएका पर्यवेक्षक, चिकित्सक, एम्बुलेन्स, फोहोर बोक्ने, पानी बोक्ने तथा दुध, औषधी बोक्ने सवारी साधन भने सञ्चालन गर्न दिइने प्रजिअ रिजालले बताउनु भयो ।

पर्यवेक्षणको क्रममा इन्सेक गण्डकी प्रदेश संयोजक खकुरेलले निर्वाचनको निश्पक्षता र स्वच्छताको लागि भयरहित वातवरणमा निर्वाचन कार्य सम्पन्न गर्नु पर्ने बताउनु भयो ।

प्रकाशचन्द्र भट्टराई