समाचारहरू

नाम्खा गाउँपालिका–५ को मुचु गाउँमा असोज ५ गते बिक्री भएको कुहिएको चामल खाद्य व्यवस्था तथा व्यापार कम्पनी लिमिटेड शाखा हुम्लालले फिर्ता गरेको छ ।  इन्सेक अनलाइनमा असोज १० गते खाद्य व्यवस्था तथा व्यापार कम्पनी लिमिटेडले बेच्यो कुहिएको चामल : स्थानीय मर्कामा भन्ने समाचार प्रकाशित भएपछि खाद्य संस्थानले असोज १३ गते चामल फिर्ता लिएको छ ।

स्थानीयलाई बिक्री भएको सो खाद्यान्न नाम्खा गाउँपालिका उपाध्यक्ष तक्दिर लामा र खाद्य व्यवस्था तथा व्यापार कम्पनी लिमिटेड सिमकोट शाखाका सुब्बा नविन आचार्यको रोहवरमा चामल फिर्ता भएको नाम्खा गाउँपालिका– ५ का स्थानीय सम्पा रिन्जिङ तामाङले बताउनुभयो ।

उहाँले इन्सेक अनलाइनमा प्रकाशित भएको समाचारका कारण हामीले अर्को नयाँ चामल पाएको बताउनुभयो । कुहिएको चामल खाद्य व्यवस्था तथा व्यापार कम्पनी लिमिटेडले फिर्ता गरेर नयाँ चामल दिएको स्थानीय तामाङको भनाइ छ ।

मुचुको तुम्कोट खोला तर्ने क्रममा टिपरवालाले भिजाएपछि यस्तो समस्या भएको खाद्य व्यवस्था तथा व्यापार कम्पनी लिमिटेड सिमकोट शाखाका सुब्बा नविन आचार्यले बताउनुभयो । इन्सेक अनलाइनमा प्रकाशित भएको समाचार प्रभावकै कारण खाद्य संस्थानले ३२ बोरा कुहिएको चामल फिर्ता गरेको सुब्बा आचार्यले जानकारी दिनुभयो ।

नन्द सिंह