समाचारहरू

अनौपचारिक क्षेत्र सेवा केन्द्र (इन्सेक) क्षेत्रीय कार्यालय, विराटनगरका प्रतिनिधिलगायत मोरङका मानव अधिकारकर्मीहरूको एक टोलीले मोरङमा वर्षाबाट भएको क्षतिबारे जानकारी सङ्कलन गर्ने क्रममा अविरल वर्षाको कारण मोरङमा १७ जनाको मृत्यु हुनुका साथै ३ हजार २ सय १ परिवार विस्थापित भएको जिल्ला प्रशासन कार्यालय मोरङले जनाएको छ ।

कार्यालयका सहायक प्रमुख जिल्ला अधिकारी शेषनारायण पौडेलले प्रहरीमा साउन ३१ गतेसम्ममा भेटिएको शव तथा आएका उजुरीका आधारमा सो जानकारी दिइएको बताए । जसमा हराइरहेका चारजनाको अवस्था अझै सार्वजनिक हुन नसकेको पौडेलले बताए । विस्थापित भएकाहरूलाई विभिन्न १७ ओटा स्थानहरूमा केन्द्रीत गरि राहत उपलव्ध गराउने कार्य भइरहेको समेत उनले जानकारी दिए ।

सरकारले एकद्वार प्रणाली अन्तर्गत राहत वितरण गर्ने भनिएकोमा आफूहरूले जिल्लामा राहत उपलव्ध गराउने निकाय र संस्थाहरूलाई राहत वितरण गरिने स्थानहरूमा दोहोरो सुविधा नपर्ने गरी स्थानीय तहमा समन्वय गरेर राहत वितरण सिफारिस गरी पठाउने गरिएको सहायक प्रजिअ पौडेलको भनाइ थियो ।

प्रभावितहरूको अवस्था बुझ्ने क्रममा इन्सेक क्षेत्रीय कार्यालय विराटनगरका संयोजक सोमराज थापा, प्रलेख अधिकृत देवराज पोखरेल, जिल्ला प्रतिनिधि इन्दिरा भट्टराई, युएनडिपीका प्रतिनिधिहरू राजेन्द्र सुब्बा, रीता परियार, ओरेक नेपालकी मौसमी राई, सिविन नेपाल मोरङका संयोजक वासुदेव अधिकारीलगायतको टोलीले जिल्ला प्रहरी कार्यालय, जिल्ला प्रशासन कार्यालय, नेपाल रेडक्रस सोसाईटी शाखा मोरङलगायतका निकायमा पुगी जानकारी लिएको थियो ।

इन्दिरा भट्टराई