समाचारहरू

अनौपचारिक क्षेत्र सेवा केन्द्र (इन्सेक) को टोलीले पर्वत जिल्लाको मानव अधिकार अवस्थाको अनुगमन गरेको छ ।

कात्तिक २८ गते पर्वत आएको इन्सेकको टोलीले जिल्लाका सरोकारवालाहरूसँग भेटघाट गरेर मानव अधिकार अवस्थाको अनुगमन गरेको हो ।

अनुगमनका क्रममा पर्वतका प्रमुख जिल्ला अधिकारी गुरूदत्त ढकालले मानव अधिकारसम्बन्धी घटना विगतको वर्षको तुलनामा चालु आर्थिक वर्षमा कमी भएको बताए ।

उनले पछिल्लो समयमा बलात्कार, लागु औषध र सार्वजनिक अपराधका घटनाहरू बढी आएको बताउँदै मानव अधिकार उल्लङ्घनका घटनाहरू कमी रहेको बताए ।

सार्वजनिक अपराध अन्तर्गत बढी मात्रामा जुवातास, चोरीका घटना रहेको सिडिओ गुरूदत्त ढकालले जानकारी दिए । ढकालले सामाजिक रूपमा सचेतना बढ्दै गएपछि मानव अधिकार उल्लङ्घनका घटनामा समेत कमी आउने बताए ।

अनुगमनका क्रममा जिल्ला प्रहरी कार्यालय पर्वतका इन्स्पेक्टर रविन्द्रकुमार श्रेष्ठले समेत मानव अधिकार उल्लङ्घन सम्बद्ध घटनाहरूमा कमी आएको बताउँदै घटना दर्तामा समेत त्यस्ता प्रकारका उजुरीहरू नआएको बताए ।

जिल्ला प्रहरी कार्यालय पर्वतमा महिला हिंसा, लागुऔषध, जुवातास, आत्महत्यासम्बन्धी घटना नै बढी दर्ता हुने गरेको उनको भनाई छ ।

भेटघाटका क्रममा नेपाल पत्रकार महासङ्घ पर्वतका अध्यक्ष छविलाल तिवारीले मुलुकमा सङ्घीय संरचना लागु भएपश्चात् स्थानीय तहहरू सञ्चार मैत्री हुन नसकेको बताए । उनले पर्वतका स्थानीय तहहरूबाट सूचना प्राप्त गर्न असहज भएको गुनासो समेत गरे ।

अनुगमन टोलीमा इन्सेक केन्द्रीय कार्यालयबाट पिएमइ अधिकृत सुबेच्छा खड्का, इन्सेक गण्डकी प्रदेशका संयोजक शिव खकुरेल र गण्डकी प्रदेशकै प्रलेख अधिकृत सुमित्रा भट्टराई सहभागी थिए ।

सन्तोष थापा