समाचारहरू

इन्सेक कपिलवस्तुले भदौ १३ गते  जिल्ला प्रहरी कार्यालयको हिरासत कक्षको अनुगमन गरेको छ ।  इन्सेकका साधारण सदस्य रुकैया खातुन, इन्सेक जिल्ला प्रतिनिधि पार्वती आचार्य र मानव अधिकार समूहकी संयोजक पुष्पा रेग्मीले हिरासत कक्षको अनुगमन गरेका हुन् ।

अनुगमनका क्रममा  जिल्ला प्रहरी कार्यालयका एसपी प्रेमबहादुर बस्नेतसँग जिल्लाको मानव अधिकारको अवस्थाको बिषयमा छलफल गरेका थिए । जिल्लामा हुने अपराधिक घटनाहरु , मानव अधिकार उल्लघंन र ज्यादतीका घटनाहरू र मधेशी,  मुश्लिम समुदायमा हुने लैंगिंक हिंसाका घटनाहरू न्यूनिकरण कसरी गर्न सकिन्छ भन्ने बिषयमा छलफल भएको थियो ।

अनुगमनका क्रममा क्षमता भन्दा बढी थुनुवाहरु रहेका,   विशेष गरी बाल विवाह , बहुविवाह , घरेलु हिंसा, लैंगिंक हिंसा , र लागूपदार्थ दुर्व्यवसनीका घटना बढी हुने गरेको पाइयो ।

जिल्ला प्रहरी कार्यालयका एसपी बस्नेतले मानव अधिकारको क्षेत्रमा प्रहरी सम्वेदनशील भएको बताउँदै जिल्लामा घट्ने बिभिन्न अपराधिक घटनाहरू न्यूनिकरण गर्न बिभिन्न अभियानहरू संचालन गर्दै आएको बताउनु भयो । हिरासत कक्षका दुई वटा कोठामा हाल २० जना व्यक्तिहरुलाई राखिएका छन् ।

इन्सेकका साधारण सदस्य रुकैया खातुनले पछिल्लो समयमा लैगिंक हिंसाका घटनाहरू वृद्धि भएको हुँदा जिल्ला प्रहरी कार्यालयले स्थानीय तह र बिभिन्न सरोकारवालाहरूसँग  समन्वय सहकार्य गर्न सुझाव दिनु भयो । हिरासत कक्षको अनुगमन गर्दै हिरासतमा अनुसन्धानमा रहेका थुनुवा नागरिकहरूसँग  कुराकानी गर्दै सरसफाईमा ध्यान दिन सुझाव दिनु भयो ।

महिला बालबालिका तथा ज्येष्ठ नागरिक सेवा केन्द्रका अनुसार आर्थिक वर्ष ०७९/०८० मा २ सय २६ जना बालबालिका हराएको भन्दै उजुरी परेका  थिए । चालु आर्थिक वर्ष ०८०/०८१ को साउन महिनामा मात्रै १८ जना बालबालिका हराएको निवेदन परेका छन् ।

पार्वती आचार्य