इन्सेकद्वारा पोखरामा आयोजित मानव अधिकारसम्बन्धी दुई दिने तालिम सम्पन्न

  ०७९ पुस १६ गते

अनौपचारिक क्षेत्र सेवा केन्द्र (इन्सेक) केन्द्रीय कार्यालय र लोकतन्त्रका लागि महिला (डब्लुपीडी नेपाल) को सहकार्य र क्यानडा सरकारको सहयोगमा आयोजना गरिएको मानव अधिकारसम्बन्धी दुई दिने तालिम पोखरामा पुस १६ गते सम्पन्न गरिएको छ ।

आर्थिक तथा सामाजिक विकास मार्फत महिला सशक्तिकरण कार्यक्रम अन्तर्गत नुवाकोट र मकवानपुरमा कार्यरत स्थानीय साझेदार संस्थाका पदाधिकारीहरूका लागि सो तालिम आयोजना गरिएको हो ।

कार्यक्रममा बोल्दै गण्डकी प्रदेशका शिक्षा, संस्कृति, विज्ञान प्रविधि तथा सामाजिक विकास मन्त्री मेखलाल श्रेष्ठले महिलाहरूलाई सक्षम र सचेत बनाउन यस्ता तालिहरू प्रभावकारी हुने बताउनु भयो ।

उहाँले महिलाहरूलाई सीप सिकाइ र श्रमलाई उत्पादनसँग जोड्दै व्यवसायीकरण गर्न सकेमात्र महिलाहरु आर्थिक रूपले सक्षम हुने बताउनु भयो । आफूहरु सदैव मानव अधिकारको पक्षमा रहेको उहाँको भनाइ थियो ।

1 (8)

जिल्ला अदालत बागलुङका न्यायाधीश डा. दिवाकर भट्टले आर्थिक, सामाजिक तथा सांस्कृतिक अधिकारको उल्लङ्घनमा न्यायिक उपचार वा न्यायिक निरुपणका विषयमा सहजीकरण गर्दै मानव अधिकार राजनीतिक, र कानुनी विषयसँगै समग्र जीवनको अपरिहार्य विषय भएको बताउनु भयो ।

उहाँले आर्थिक, सामाजिक तथा सांस्कृतिक अधिकारका लागि सर्वोच्च अदालतको भूमिका रचनात्मक रहेको बताउनु भयो ।

गण्डकी प्रदेश मुख्यमन्त्री कार्यालयका सचिव मनमाया पङ्गेनीले महिलाहरूको  सामाजिक तथा आर्थिक सशक्तिकरणका लागि सरकार र मन्त्रिपरिषद्ले पहल गर्नुपर्नेमा जोड दिनु भयो । महिला हिंसा न्यूनीकरणका लागि घरघरबाट अभियान सञ्चालन गर्नुपर्ने उहाँको भनाइ थियो ।

कार्यक्रममा इन्सेक गण्डकी प्रदेशका संयोजक शिव खकुरेलले मानव अधिकारसम्बन्धी यस्ता तालिमले महिलाहरूलाई अझ बढी सबल र सशक्त बनाउन महत्वपूर्ण भुमिका निर्वाह गर्ने बताउँदै तालिममा सिकेका कुराहरूलाई पूर्णरुपले व्यवहारमा कार्यान्वयन गर्न समेत सहभागीहरुलाई आग्रह गर्नु भयो ।

कार्यक्रममा जिल्ला समन्वय समिति कास्कीका प्रमख लिलाधर पौडेल, मानव अधिकार आयोगका अधिकृत मोहन काफ्ले, श्रेया बज्राचार्य, इन्सेक केन्द्रीय कार्यालय काठमाडौंका परियोजना अधिकृत कृष्णप्रसाद नेपाल र व्यवस्थापन प्रमुख सुबेच्छा खड्का लगायतले मानव अधिकारका विषयमा धारणा राख्नु भएको थियो ।

IMG_4126


मोहन कुमार बिष्ट