समाचारहरू

इन्सेक केन्द्रीय कार्यालयद्वारा तनहुँ क्षेत्र नम्बर– १ मा हुने निर्वाचनकाे पूर्व पर्यवेक्षण गरिएको छ ।

इन्सेकका संस्थापक अध्यक्ष तथा राष्ट्रिय मानव अधिकार आयोगका पूर्व आयुक्त सुशिल प्याकुरेलको नेतृत्वमा तनहुँमा निर्वाचन पूर्वको तयारीको अवस्था, निर्वाचन आचार संहिताको पालनाको अवस्था, शान्ति सुरक्षाको अवस्था तथा दल तथा उम्मेदवारहरूको गतिविधिको बारेमा  वैशाख ७ गते पर्यवेक्षण गरिएको छ ।

सो अवसरमा तनहुँका मुख्य निर्वाचन अधिकृत कोमलनाथ आचार्य, प्रमुख जिल्ला अधिकारी छविलाल रिजाल तथा नागरिक समाजका प्रतिनिधिहरूसँग पनि यसबारेमा छलफल गरिएको थियो । साथै उम्मेदवारहरूसँग पनि घरदैलोको क्रममै भेट गरि प्रचार अभियानको बारेमा छलफल भएको थियो ।

पर्यवेक्षणको क्रममा इन्सेकका संस्थापक अध्यक्ष प्याकुरेलले निर्वाचनको स्वच्छता र निश्पक्षता कायम हुनुपर्ने बताउनु भयो । त्यहि विषयमा अनुगमन र पर्यवेक्षणको आवश्यकता देखिएको भन्दै उहाँले राज्यशक्तिको दुरूपयोग हुनसक्ने तर्फ सचेत बन्नुपर्ने बताउनु भयो ।

निर्वाचन आचार संहिताको उल्लङ्घन भएको भन्ने गुनासो आएको भन्दै प्याकुरेलले यसबारेमा सरोकारवालाहरू बढि गम्भिर बन्नु पर्ने बताउनु भयो ।

छलफलमा तनहुँ क्षेत्र नम्बर– १ का मुख्य निर्वाचन अधिकृत कोमलनाथ आचार्यले दल तथा उम्मेदवारहरूलाई निर्वाचन आचार संहिताको पुर्ण पालना गर्न पटक–पटक ध्यानाकर्षण गराइएको बताउनु भयो । उहाँले आचार संहिता उल्लङ्घन  भएको बारेमा कुनै उजुरी नआएपनि आफुहरूले अनुगमन समिति मार्फत र सुरक्षा निकायमार्फत आचार संहिताको पालना गराउन ध्यानाकर्षण गराइएको बताउनु भयो ।

निर्वाचनको स्वच्छता र निश्पक्षताको सबैले सम्मान गनुपर्ने भन्दै उहाँले विहिबार रातीदेखी हुने मौन अवधिमा विशेष चनाखो रहनुपर्ने बताउनु भयो । मौन अवधिमा सुरक्षा निकायलाई बढि सेचत हुन निर्देशन दिइएको उहाँले बताउनु भयो ।

भौगोलिक विकटता भएको तिनओटा मतदान स्थललाई संवेदनशिल स्थानको रूपमा राखी विशेष निगरानी गरेको उहाँले बताउनु भयो ।

प्रमुख जिल्ला अधिकारी छविलाल रिजालले उपनिर्वाचन भएको कारणले यस क्षेत्रमा बढि महत्वले हेरिएको बताउनु भयो । उहाँले पनि निर्वाचन आचार संहिताको पालनामा ध्यानाकर्षण गराइएको बताउनु भयो । निर्वाचनको क्रममा मतदाता, उम्मेदवार र कर्मचारीहरूको सुरक्षामा कुनै कमी हुन नदिइने प्रजिअ रिजालले बताउनु भयो ।

सो पर्यवेक्षणमा इन्सेक केन्द्रिय कार्यालयका बरिष्ठ अधिकृतद्वय कृष्ण गौतम, सम्झा श्रेष्ठ र इन्सेक जिल्ला प्रतिनिधि प्रकाशचन्द्र भट्टराईको सहभागिता रहेको थियो ।

प्रकाशचन्द्र भट्टराई