इन्सेकद्वारा निर्वाचन आयोगसमक्ष स्थानीय तह निर्वाचन–२०७९ पर्यवेक्षण प्रतिवेदन पेश

  ०७९ जेठ ३० गते

इन्सेकले निर्वाचन आयोगसमक्ष जेठ ३० गते स्थानीय तह निर्वाचन–२०७९ पर्यवेक्षण प्रतिवेदन पेश गरेको छ । इन्सेककर्मीको एक टोली आयोगमा पुगेर प्रतिवेदन पेश गरेको हो भने अनलाइनमाध्यमबाट पनि प्रतिवेदन पेश गरेको छ ।

यसअघि इन्सेकले छिटफुट वादविवाद, केही झडप तथा आचारसंहिता उल्लङ्घनका घटना बाहेक शान्तिपूर्ण रूपमा स्थानीय तहको निर्वाचन सम्पन्न भएको उल्लेख गरी निर्वाचनकै दिन प्रारम्भिक प्रतिवेदन पेश गरिसकेको थियो ।

निर्वाचन आयोगबाट पर्यवेक्षण अनुमति प्राप्त गरेका आफ्ना २ सय ३४ जना पर्यवेक्षकले देशभरका २ सय ५० भन्दा बढी मतदानस्थलको अनुगमन गरेको जनाउँदै इन्सेकले विगतका निर्वाचनजस्तै यस निर्वाचनमा पनि अपाङ्गता भएका मतदाताले केही स्थानमा मतदान गर्न कठिनाइ भोग्नु परेको जनाएको छ ।

अघिल्लो निर्वाचनका लागि मतदाता परिचयपत्र लिएका मतदाताको क्रम सङ्ख्या फरक हुँदा नाम खोज्न समय लागेको र यसले मतदान प्रक्रियामा ढिलासुस्ती भएको पनि इन्सेकले जनाएको छ ।

प्रतिवेदन बुझ्दै निर्वाचन आयोगका उपसचिव कमल भट्टराईले पर्यवेक्षण प्रतिवेदनमा औँल्याइएका विषयलाई आयोगले तयार गर्ने एकीकृत प्रतिवेदनमा समेट्ने बताउनु भयो ।

इन्सेकको निर्वाचन पर्यवेक्षण फोकल पर्सन एवम् इन्सेक अनलाइनका सम्पादक रमेशप्रसाद तिमल्सिनाले निर्वाचन पर्यवेक्षणका क्रममा देखिएका विषयलाई प्रतिवेदनमा समावेश गरिएको बताउनु भयो ।

प्रतिवेदन बुझाउँदै इन्सेक अनलाइन अङ्ग्रेजी सम्पादक आर्या अधिकारीले पर्यवेक्षण गर्ने संस्थाहरूसँग छलफल गरी आगामी निर्वाचनहरूमा पर्यवेक्षण कार्यलाई सहज बनाउनु पर्ने बताउनु भयो ।

स्थानीय तह निर्वाचन–२०७९ पर्यवेक्षण प्रतिवेदन पढ्न यहाँ क्लिक गर्नु होला ।


अनलाइन डेस्क