समाचारहरू

वीरेन्द्रनगर नगरपालिका–११, बाल्वाटारका आर्थिक अवस्था कमजोर भएका दुई घरपरिवार किरियापुत्रीलाई इन्सेकको समन्वयमा खाद्यान्न सहयोग गरिएको छ । स्थानीय ३५ वर्षीया ओमीसरा नेपाली र ४० वर्षीय अम्मर बहादुर गन्धर्वलाई ०८१ असोज ११ गते सहयोग गरिएको हो ।

नेपालीकी सासुआमा र गन्धर्वको जेठानको मृत्यु भएको थियो । उनीहरूलाई किरिया बसेको समयमा खाद्यान्नको समस्या भएपछि इन्सेकमा सहयोगका लागि अपिल गरेका थिए । इन्सेक कर्णाली प्रदेश संयोजक नारायण सुवेदीको अगुवाइमा नवज्योति केन्द्र र वीरेन्द्रनगर नगरपालिका–११ को कार्यालयले चार बोरा चामल, चार किलो दाल, चार किलो चना, चार लिटर तेल, चार किलो नुन, चार दर्जन बिस्कुट र दुई किलो स्याउ सहयोग गरिएको छ ।

किरिया बसेको अवस्थामा खाद्यान्नको समस्या परेको भन्ने खबर आएपछि नवज्योति र वडा कार्यालयसँग समन्वय गरेर खाद्यान्न सहयोग गरिएको इन्सेक कर्णाली प्रदेश कार्यालयका संयोजक नारायण सुवेदीले बताउनु भयो ।

त्यस्तै वीरेन्द्रनगर नगरपालिका–११ का वडा सदस्य टोपलाल तिवारीले दुःख सबैलाई आउने र यस्तो समयमा पनि सहयोगको लागि समन्वय गर्ने इन्सेकलाई धन्यवाद दिनुभयो । नवज्योती केन्द्रकी जरमाया बाठाले किरियामा सहज होस् भनेर आफूहरूले सहयोग गरेको भन्दै खाद्य अधिकारमा चासो देखाउने इन्सेकलाई आभार प्रकट गर्नुभयो । सहयोग हस्तान्तरण कार्यक्रममा नवज्योतिकी देवी कार्की, नेपाल गन्धर्व विकास संघका छायाँ बैगार र सहकर्मी समाजका कुवेर थापाको उपस्थिति रहेको थियो ।

जगतदल जनाला विक