समाचारहरू

राज्यबाट निःशुल्क शिक्षा प्रदान गरेपनि विद्यालयको पहुँचबाट वञ्चित सर्लाहीका ६० जना बालबालिकालाई इन्सेकको सहयोगमा भर्ना गरिएको छ ।

तराई मधेसका जिल्लामा गरिबीको रेखामूनि रहेका मुसहर जातका बालबालिका विद्यालय भर्ना हुन सकेका थिएनन् ।

जिल्ला शिक्षा कार्यालयले नयाँ शैक्षिक सत्रमा भर्ना अभियान चलाएपनि गरीब विपन्न दलित मुसहर बस्तीका बालबालिका विद्यालय बाहिर छन् । पाठ्यपुस्तक, विद्यालय पोशाक र समयमा खाना नपाएका कारण राज्यबाट प्राप्त अधिकारबाट समेत मुसहर बालबालिका वञ्चित भएका छन् ।

गाउँ छेउमै विद्यालय भएपनि आर्थिक विपन्नताकै कारण सर्लाही जिल्ला बबरगञ्ज-४ गढा टोलमा विद्यालय भर्ना हुन नसकेका ६० जना मुसहर बालबालिकालाई चन्दा सङ्कलन गरी विद्यालय भर्ना गराइएको हो ।

विद्यालय जान नपाएका सिङ्गो बस्तीकै बालबालिकालाई इन्सेक जिल्ला प्रतिनिधिको पहलकदमीमा झोला, चप्पल, पाठ्यपुस्तक प्रदान गर्दै बबरगञ्ज स्थित दुर्गा खोभारी माध्यमिक विद्यालयमा जेठ ८ गते भर्ना गराइएको हो ।

सञ्चार माध्यममा पटकपटक समाचार आएपनि सरेकारवाला निकायहरूले कुनै पहल नगरेपछि स्थानीय युवाहरूले खाजा खर्च जोगाएर मुसहर बालबालिकालाई केही दिन घरमै ट्यूसन कक्षा सञ्चालन गरी विद्यालय भर्ना गराएका हुन् ।

विद्यालय भर्नाको क्रममा पाठ्यपुस्तकसहितको झोला पाएपछि मुसहर बालबालिका विद्यालय जान उत्साहित भएको दुर्गा खोभारी माध्यमिक विद्यालयका प्रधानध्यापक देवेन्द्र साहले बताए ।

सन्तोषकुमार सिंह