समाचारहरू

नागरिकता प्रमाणपत्र दिन पतिले इन्कार गर्दा पर्वतको जलजला गाउँपालिका–७ धाइरिङकी ३४ वर्षीया सेती परियारले विवाह गरेको १७ वर्षपछि नेपाली नागरिकताको प्रमाणपत्र पाएकी छिन् ।

३२ वर्षीय पति गोविन्द दमाईबाट पालन पोषण र रेखदेखमा सहयोग नगरी घरेलु हिंसा खेप्दै आएकी परियारले कात्तिक २९ गते विहिबार जिल्ला प्रशासन कार्यालय पर्वतबाट नेपाली नागरिकताको प्रमाणपत्र प्राप्त गरेकी हुन् ।

नेपाली नागरिकता प्रमाणपत्र नहुँदा विभिन्न अवसरबाट वञ्चित भएकी सेती परियारलाई उनका ससुरा ठूले परियारले सनाखत गर्दै नागरिकता प्रमाणपत्र दिलाउन सहयोग गरेका हुन् ।

पीडित सेती परियारले आफू पतिबाट पीडित भएको र नेपाली नागरिकता समेत पाउन नसकेको भन्दै ०७५ कात्तिक ८ गते इन्सेक पर्वत जिल्ला प्रतिनिधि समक्ष सहयोगका लागि निवेदन पेश गरेकी थिइन् ।

उनको निवेदनको आधारमा जलजला गाउँपालिका–७ धाइरिङका वडा अध्यक्ष टुङगनाथ शर्मासमक्ष सिफारिस दिलाउन पहल गर्नुका साथै प्रमुख जिल्ला अधिकारी गुरूदत्त ढकालसमक्ष पटक टक नागरिकता दिलाउन आग्रह गरिएको इन्सेक प्रतिनिधि सन्तोष थापाले जानकारी दिए ।

थापाका अनुसार जिल्ला प्रशासन कार्यालय पर्वतले सेती परियारलाई कात्तिक २९ गतेको मितिमा नेपाली नागरिकता प्रमाणपत्र जारी गरी प्रमाणपत्र प्रदान गरिएको छ । नागरिकता प्राप्त गरेपछि परियारले आफ्नो अधिकार खोज्ने ढोका खुलेको भन्दै खुशी व्यक्त गरिन् ।

गोविन्द दमाई सँग २०५८ साल मङ्सिर २२ गते सामाजिक परम्परा अनुसार विवाह गरेकी सेतीका दुई जना छोरा १३ वर्षीय रूद्र र तीन वर्षीय सुरज छन् ।

अनलाइन डेस्क