समाचारहरू

सिमकोट गाउँपालिका-६ की ५० वर्षीया बाँचु सुनारले इन्सेक प्रतिनिधि नन्द सिंहको पहलमा साउन २१ गते नागरिकता पाएकी छन् ।

०७५ साउन २० गते इन्सेक प्रतिनिधिलाई सुनारले नागरिकता नपाएको भन्दै लिखित निवेदन दिएकी थिइन् । सुनार ५० वर्षभइसक्दा पनि नागरिकता नपाएपछि विभिन्न सरकारी सेवाबाट पनि वञ्चित भएकी थिइन् ।

नागरिकता बनाउनका लागि जिल्ला प्रशासन कार्यालयमा गएपछि अघिल्लो पतिको मृत्यु दर्ता र विवाह दर्ताको प्रमाण खोज्दै झारो टार्ने काम गरेको भन्दै नागरिकता नबनेको पीडित सुनारले गुनासो गरिन् । उनका अनुसार आफ्नो पतिको २९ वर्षकै उमेरमा मृत्यु भएकाले समयमै विवाह र नागरिकताको प्रमाण पत्र नबनाएकोले यसरी पीडित भएको गुनासो गरिन् ।

इन्सेक प्रतिनिधिलाई साउन २० गते नागरिकता बनाउन सहयोगको माग गर्दै अनुरोध गरेपछि सोही दिन इन्सेक प्रतिनिधि नन्द सिंहले सहायक प्रमुख जिल्ला अधिकारी महेशकुमार पोखरेलसँग मौखिक अनुरोध गरेका थिए । सहायक प्रजिअ पोखरेलका अनुसार पीडित सुनारको प्रमाणित गर्ने कुनै पनि प्रमाण नभएकाले नागरिकता बनाउन नसकेको भनेर बताए ।

पीडित सुनारको जन्मस्थान खार्पुनाथ गाउँपालिका-३ को राया गाउँमा भएको थियो भने पहिलो विवाह पनि सोही गाउँपालिका-१ मा भएको थियो ।

एकै गाउँपालिका भएकाले पतिको मृत्यु दर्ताको प्रमाण पनि सोही गाउँपालिकाबाट गर्नु पर्ने प्रजिअ पोखरेलले बताए ।

तर, उनले दोस्रो विवाह सिमकोट गाउँपालिका-६ मा भएकाले नागरिकता पाउनु पर्ने पीडितले माग गरेकी थिइन् । सुनारले गरेको अनुरोधपछि खार्पुनाथ गाउँपालिकालाई बाँचु सुनारका पहिलो पतिको मृत्यु दर्ताको प्रमाण बनाइ दिनका लागि इन्सेक प्रतिनिधिले अनुरोध गरे लगतै साउन २१ गते सुनारको नागरिकता बन्न सफल भएको हो ।

सोही नागरिकताका लागि सहायक प्रमुख जिल्ला अधिकारीसँग पनि मौखिक अनुरोध गरेपछि पीडितले नागरिकता पाएकी हुन् । पीडित सुनारले अबदेखि सरकारी सेवा पनि पाउने भएकाले इन्सेक प्रतिनिधिलाई धन्यबाद समेत दिएकी छन् ।

इन्सेक कार्यालय, प्रदेश ५