समाचारहरू

इन्सेक पाँचथरको पहलमा दैवी प्रकोपमा परेका ३३ जनालाई असोज २१ गते २ लाख ४४ हजार रुपियाँ सहयोग प्रदान गरिएको छ ।

फाक्तेप गाविस-१ स्थायी ठेगाना भई हाल दक्षिण कोरियामा कार्यरत भीमराज चेम्जोङको संयोजनमा १ सय नौ जना नेपालीहरूवाट सङ्कलित उक्त रकम २०७२/०७३ मा आगलागीबाट पीडित भएका परिवारका सदस्यलाई प्रदान गरिएको इन्सेक पाँचथर जिल्ला प्रतिनिधि मङ्गल बेघाले बताए ।

बेघाका अनुसार आगलागीबाट अति प्रभावित गाविसहरू स्वाबरूम्बाका ११, रानीगाउँका ७, भारापाका ५, फाक्तेपका ५ र साविक चोकमागुका ५ ओटा घरधुरीहरूलाई सहयोग प्रदान गरिएको हो ।

आगलागीबाट पीडित भएकाहरूमध्ये क्षतिको विवरण अनुसार ५ हजार रुपियाँदेखि ११ हजार ५ सय रुपियाँसम्म रकम प्रदान गरिएको पनि उनले बताए ।

दैवी प्रकोपबाट विपत्तिमा परेको बेला राज्यवाट उचित सहयोग नपाएको रानीगाउँ गाविस-८ का गोपादेवि सम्बाहाम्फेले बताइन् । आगलागीवाट ससुरा गुमाएकी उनले ११ हजार ५ सय रकम बुझेपछि सहयोग गर्नेहरूलाई धन्यवाद ज्ञापन गरिन् । इन्सेकको पहल र कोरियमा कार्यरत नेपालीहरूको सहयोग प्रशंसनीय रहेको नेपाल पत्रकार महासङ्घका सचिव गिरिराज बास्कोटाले बताए ।

अनलाइन डेस्क