इन्सेकको पहलः गोमाको हातमा नागरिकता

  ०७८ भदौ २२ गते

मुसिकोट नगरपालिका–३ की ५० वर्षीया गोमा थापाले इन्सेकको पहलमा भदौ १६ गते नागरिकता प्राप्त गर्नु भएको छ ।

प्रमुख जिल्ला अधिकारी रुद्रादेवी शर्माले मुसिकोट नगरपालिकाका मेयर सोमनाथ सापकोटा, जिल्ला प्रहरी कार्यालयका एसपी गोपालचन्द्र भट्टराई, वडाध्यक्ष कर्णध्वज जिसी, इन्सेक प्रतिनिधि टोपलाल अर्याल लगायत सरोकारवालाको उपस्थितीमा गोमाको घरमै पुगेर नागरिकता दिनुभएको हो ।

गोमा शारीरिक रुपमा अशक्त हुनु हुन्छ । उहाँको कम्मर तलको भाग चल्दैन । त्यसैमा मानसिक समस्या छ । नागरिकता नभएका कारण कारण अपाङ्गता भएको १० वर्षसम्म पनि सामाजिक सुरक्षा भत्ताबाट वञ्चित भएको मुसिकोट नगरपालिका कार्यपालिका सदस्य सरस्वती घिमिरेले बताउनु भयो ।

मानसिक एवम् शारीरिक समस्या भएका कारण प्रशासनसम्म पुगेर नागरिकता बनाउन नसकेपछि दिदी टीका घिमिरे र मुसिकोट नगरपालिकाको कार्यापालिका सदस्य सरस्वती घिमिरेले साउन १४ गते इन्सेक प्रतिनिधि टोपलाल अर्याललाई आवश्यक सहजीकरणको लागि निवेदन दिनु भएको थियो ।

इन्सेक प्रतिनिधि अर्यालले गोमाको विषयमा प्रमुख जिल्ला अधिकारी शर्माको ध्यानाकर्षण र सहजीकरणमा पहल गर्नु भएको थियो । नागरिकता पाएपछि गोमासँगै परिवारका सदस्यहरू खुसी भएका छन् ।


टोपलाल अर्याल