समाचारहरू

म्याग्दे गाउँपालिकाले गाउँपालिका भित्रका आधारभूत र मावि तहमा अध्ययन गर्ने छात्राहरूको लागि हालै सेनेटरी प्याड उपलब्ध गराएको छ ।

गाउँपालिकाका नौ ओटै वडा आधारभुत र मावि तहका विद्यालयमा अध्ययन गर्ने छात्राहरूको लागि ५ हजार प्याकेट सेनेटरी प्याड उपलब्ध गराइएको गाउँपालिकाका प्रमुख प्रशासकीय अधिकृत दयाराम तिवारीले बताए ।

गाउँपालिकाका आधारभुत र मावि तहसहित कक्षा ११ र १२ मा ७ सय ५३ जना छात्राहरू अध्ययन गर्दै आएको प्रमुख प्रशासकीय अधिकृत तिवारीले बताए ।

ति छात्राहरूलाई आगामी शैक्षिक सत्रसम्म पर्याप्त हुने गरी विद्यार्थी अनुपातको आधारमा विद्यालयलाई सेनेटरी प्याड उपलब्ध गराइएको बताए ।

गाउँपालिकाले ३ लाख २५ हजार रुपियाँले ५ हजार प्याकेट सेनेटरी प्याड खरिद गरेको थियो । विद्यालयकी शिक्षिकाहरूलाई सेनेटरी प्याडको जिम्मा दिइएको र उनीहरूले नै प्रयोग गर्ने छात्राको रेकर्ड राख्ने समेत प्रमुख प्रशासकीय अधिकृत तिवारीले बताए ।

महिनावारी भएको समयमा कुनै पनि छात्राको पढाई अवरोध नहोस भन्ने उद्देश्यले गाउँपालिकाले निर्णय नै गरेर सेनेटरी प्याड उपलब्ध गराइएको वडा नम्बर १ का अध्यक्ष शिवशरण वाग्लेले बताए ।

सेनेटरी प्याड विद्यालयमा नै उपलब्ध भएपछि छात्राहरू खुसी भएको महेन्द्र माविका प्रअ सोमबहादुर थापाले बताए । यसले छात्राहरूको विद्यालय आउने दरमा कुनै कमी नआउने विश्वास पनि लिइएको उनले बताए ।

इन्सेकले मानव अधिकार निगरानी समूहमार्फत आधारभूत र मावि तहको विद्यालयमा सेनेटरी प्याड उपलब्ध गराउन गाउँपालिकामा पटक पटक ध्यानाकर्षण गराएको थियो ।

विभिन्न समयमा गाउँपालिकाका अध्यक्ष, उपाध्यक्ष, प्रमुख प्रशासकीय अधिकृत तथा वडा अध्यक्षहरूको उपस्थितिमा भएको कार्यक्रममा इन्सेक प्रतिनिधि र मानव अधिकार निगरानी समूहका सदस्यहरूले विद्यालयमा सेनेटरी प्याड उपलब्ध गराउन गाउँपालिकाको ध्यानाकर्षण गराएको थियो ।

साथै गाउँपालिकाले नै सेनेटेरी प्याड उपलब्ध गराउन दबाब दिने उद्देश्यले इन्सेकको पहलमा २०७४ फागुन २८ गते म्याग्दे–७ को रत्न माविमा ३ सय प्याकेट सेनेटरी प्याड उपलब्ध गराइएको थियो ।

गाउँपालिकाका प्रमुख प्रशासकीय अधिकृत दयाराम तिवारीले इन्सेकलगायत सङ्घसंस्थाले पनि पटकपटक अनुरोध गरेको र विद्यालयबाट पनि माग भएपछि सबै विद्यालयमा सेनेटरी प्याड उपलब्ध गराएको बताए ।

प्रकाशचन्द्र भट्टराई