इन्सेकको पहलमा कारागारमा टिभी सहयोग

  ०८१ वैशाख ९ गते

इन्सेकको पहलमा नेपाल निजामती कर्मचारी सङ्गठनले गुल्मी कारागारका कैदीबन्दीहरूलाई टिभी सहयोग गरेको छ । ३४ औँ स्थापना दिवसको अवसरमा सङ्गठनले वैशाख ७ गते जिल्ला कारागार गुल्मीका कैदीबन्दीहरूलाई ४२ इन्चको एलसिडी टिभी सहयोग गरेको हो ।

लुम्बिनी प्रदेश सभा सदस्य डिल्लीराज भुसालले इन्सेकको पहल र सङ्गठनको सहयोग निकै प्रशंसायोग्य रहेको बताउनु भयो । सङ्गठनले विभिन्न समयमा कारागारमा सहयोग गर्दै आएको उहाँले बताउनु भयो ।

निजामती कर्मचारी सङ्गठन गुल्मीका अध्यक्ष भीमलाल खनालले इन्सेक जिल्ला प्रतिनिधिको पटक–पटकको आग्रहलाई सार्थक बनाउँदै कारागारमा सहयोग गर्न पाएकोमा खुसी लागेको बताउनु भयो । उहाँले केही वर्ष पहिले पनि कारागारका कैदीबन्दीहरूका लागि खाना पकाउने भाडाकुँडा वितरण गरेको स्मरण गर्नुभयो । उहाँले भन्नुभयो, ‘इन्सेकको आग्रहमा सानो रचनात्मक काम गरेर स्थापना दिवस मनाउन पाउँदा खुसी छौँ ।'

आफूहरूले इन्सेकलाई गराएको ध्यानाकर्षण सङ्गठनले पुरा गरिदिएकोमा कारागारका नाइके हरि थापाले खुसी व्यक्त गर्नुभयो । अहिले गुल्मी कारागारमा १ सय १७ जना रहेका छन् । २५ जनाको क्षमता रहेको गुल्मी कारगारमा झण्डै पाँच गुणा कैदीबन्दी हुँदा व्यवस्थापनमा निकै सङ्कट रहेको छ । अहिले कैदी ८४ जना, ३० जना बन्दी र तीन जना नाबालक छन् । त्यसमध्ये पुरुष कैदी ७७ जना र बन्दी २६ जना छन् । महिला कैदी सात जना र बन्दी चार जना रहेको छ ।

Photo21042044Gulmi22


टोपलाल अर्याल