समाचारहरू

गाविस कार्यालय छेउमा परिचय पत्रका लागि याचना गरेर बसेका चिदीपानी गाविस-९ का ५० वर्षीय बमबहादुर घर्तीले माघ ११ गते अपाङ्गता परिचयपत्र पाएका छन् ।

इन्सेक अनलाइनमा माघ ८ गते गाविस कार्यालय छेउबाटै परिचय पत्रको लागि याचना ! शीर्षाकमा समाचार प्रकाशन भएपछि इन्सेक पाल्पा जिल्ला प्रतिनिधि यज्ञमूर्ति तिमिल्सिनाको पहलमा पाल्पाका प्रमुख जिल्ला अधिकारी बावुराम गौतमले महिला विकास अधिकृत तुल्सा अर्याललाई सम्पर्क गरी तत्काल परिचयपत्र उपलब्ध गराउन निर्देशन दिएका थिए ।

माघ ११ गते महिला तथा बालबालिका कार्यालयकी प्रमुख तुल्सा अर्यालले बमबहादुरको कटेरोमै पुगेर उनलाई 'रातो परिचयपत्र' दिइन् । परिचयत्रप प्रदान गर्दै अधिकृत अर्यालले परिचय पत्र पाउनु पर्ने ब्यक्तिलाई यसरी घरमै आएर परिचयपत्र प्रदान गर्न पाउँदा आफू पनि खुशी भएको बताइन् ।

प्रमुख जिल्ला अधिकारी बावुराम गौतमले प्रतिक्रिया दिँदै यस्तो महत्वपूर्ण विषय उठान गरेकोमा इन्सेकलाई धन्यवाद दिए । उनले भने-'यो निकै सराहनीय काम हो । गाविस सचिव मनिशा रोकाहाले अब बमबहादुरले मासिक २ हजार रुपियाँ सामाजिक सुरक्षा भत्ता पाउने बताइन् । उनले गाविसको तर्फबाट उनको सबै कागजपत्र तयार गरिसकेको र भत्ताको लागि जिविसमा पठाउने बताइन् ।

परिचयपत्र पाएपछि खुशी हुँदै बमबहादुर भने-'मैले अहिले आएर न्याय पाएँ ।' प्यारलाइसिसका कारण २ वर्षअघिदेखि देब्रे हर चल्न छोडेपछि उनलाई समुदायस्तरबाट बाटो छेउमा कटेरो बनाएर राखिदिएका छन् ।

इन्सेक पश्चिमाञ्चल क्षेत्रीय कार्यालय, पोखरा