समाचारहरू

अनौपचारिक क्षेत्र सेवा केन्द्र (इन्सेक) पोखरा र अपाङ्गता स्वाबलम्बन विकास सङ्घ (डिडा) नेपालको संयुक्त आयोजना तथा पोखरा लेखनाथ महानगरपालिकाको आर्थिक सहयोगमा असार १५ गते पोखरामा पहुँचयुक्त शहर विकास प्रवर्धन विषयक अन्तरक्रिया कार्यक्रम सम्पन्न गरिएको छ ।

कार्यक्रममा प्रदेश चारका भौतिक योजना तथा पुर्वाधार विकास मन्त्री रामशरण बस्नेतले जनचेतना र इच्छाशक्तिको अभाव नै पहुँचयुक्त भौतिक संरचना निर्माणमा बाधक भएको कुरा बताएका छन् ।

'अब हामी पुर्वाधार विकासको चरणमा छौँ । हामीले भनेको सबै नहुन सक्छ । तर, हामीले पोखरालगायत विभिन्न शहरलाई पहुँचयुक्त शहर निर्माणका लागि सुरूवात गरेका छौँ ।'-उनले भने ।

'हाम्रा कामले नै हो अब हामी विकासको कुन चरणमा छौँ भन्ने देखाउने ! त्यसैले प्रदेश सरकार अब स्थानीय सरकारसँगिको समन्वय र सहकार्यमा अगाडि बड्नेछ । प्रदेश सरकारले आफ्नो नीति तथा कार्यक्रममा नै पहुँचयुक्त शहर निर्माण गर्ने कुरालाई नीतिगत रूपमै सम्बोधन गरेको छ ।'-मन्त्री बस्नेतले भने ।

बोल्दै राष्ट्रिय मानव अधिकार आयोग, पोखराकी निमित्त निर्देशक नितु गर्तौलाले पहुँचयुक्त शहर निर्माणलाई सबैले आआफ्नो जिम्मेवारीको रूपमा लिनुपर्ने बताइन् ।

पोखरालेखनाथ मनपा-८ का अध्यक्ष रूद्रप्रसाद बरालले अब बन्ने भौतिक संचनालाई पहुँचयुक्त बनाउन प्रतिबद्ध रहेको बताए ।

इञ्जिनियर रविचन्द्र घिमिरेले यस्ता कार्यक्रमहरूले योजना बनाउँदा यस विषयलाई सम्बोधन गर्न याद दिलाएको बताए ।

शान्तिका लागि नागरिक समाजको सञ्जाल, कास्कीका संयोजक विष्णुप्रसाद बरालले पहुँचयुक्त शहर निर्माणका लागि कुनै स्रोत र साधनको कमी नभएको बताए ।

कास्की नेत्रहीन सङ्घका अध्यक्ष लक्ष्मण सुवेदीले पहुँचयुक्त शहर निर्माणसम्बन्धी सरकारको नीति तथा कार्यक्रम भएता पनि व्यवहारमा कार्यान्यन नहुँदा समस्या आएको बताए ।

राष्ट्रिय अपाङ्ग महासङ्घ कास्कीका अध्यक्ष हेम गुरूङले अपाङ्गता क्षेत्रलाई व्यवस्थापन कसरी गर्ने भन्ने सोच सरकारमा नहुँदा यो समस्या आएको हो भन्दै समग्र अवरोधले सहभागितामा कमी ल्याउने बताए ।

इन्सेक कार्यालय, पोखरा