‘आलमलाई जेलबाट छुटाउन लागिरहनेछु’-कांग्रेस सभापति देउवा

समाचारहरू

कुनै खास जिल्लाको समाचारको लागि :

'आलमलाई जेलबाट छुटाउन लागिरहनेछु'-कांग्रेस सभापति देउवा

रौतहट

नेपाली कांग्रेसका सभापति एवम् पूर्व प्रधानमन्त्री शेरबहादुर देउवाले विभिन्न मुद्दामा पुर्पक्षका लागि थुनामा रहेका पूर्वमन्त्री मोहम्मद आफ्ताव आलमलाई धैर्य गरेर बस्न आग्रह गर्नु भएको छ ।

गढीमाई नपा–६ धर्मपुरस्थित श्री १०८ विष्णु महायज्ञको उद्घाटन गर्न फागुन १९ गते आउनु भएका सभापति देउवाले आलमलाई छुटाउन आफू लागिपरेको बताउनु भएको हो ।

‘हाम्रा यहाँका साथी जेलमा हुनुहुन्छ । म उहाँलाई छुटाउन लागिरहने छु ।’–उहाँले भन्नु भयो–‘अहिले अदालतको कुरा हो । उहाँले धैर्य राखेर चिन्ता नलिई बस्नु भयो भने भोलिका दिनमा परिस्थिति बदलिन्छ । त्यसका लागि पनि उहाँलाई निर्धक्क साथ बस्नु होला भन्न चाहन्छु ।’

दुई जना नेपालीसहित २३ जनाभन्दा बढी व्यक्तिलाई इँटाभट्टामा जिउँदै जलाएको आरोपमा गिरफ्तार परेका पूर्व मन्त्री एवम् रौतहट क्षेत्र नं २ का सांसद मोहम्मद आफताव आलमलाई रौतहट जिल्ला अदालतले २०७६ कात्तिक २९ गते पुर्पक्षका लागि थुनामा पठाउने आदेश दिएको थियो ।

आलामलाई ३२ वर्ष कैदको मागसहित तीन ओटा मुद्दा चलाइएको छ । २०६४ चैत २७ गते बम विष्फोट गराएको, कर्तव्य गरी ज्यान लिएको र ज्यान मार्ने उद्योग गरेको आरोपसहित आलमविरुद्ध मुद्दा चलाइएको हो ।

पहिलो संविधान सभा निर्वाचनको अघिल्लो दिन २०६४ चैत २७ गते राति राजपुरको फरदवा गाउँमा नेपाली कांग्रेसका नेता शेख इद्रिसको घरमा निर्वाचनलाई लक्षित गरेर बम बनाउँदै गर्दा बम विष्फोट हुँदा घाइते भएकाहरूलाई उपचार गर्नुको सट्टा जिउँदै इँटाभट्टामा जलाएको आरोप आलममाथि लागेको छ ।

सम्बन्धित समाचार