समाचारहरू

घरको आर्थिक अवस्था अति कम्जोरी भएपछि विद्यार्थीहरू दाउरा बेच्न जार्नुपर्ने बाध्यताले पठनपाठनमा समस्या भएको छ । सिमकोट गाउँपालिका–७ स्थित कैलाश माध्यमिक विद्यालयका विद्यार्थीलाई दैनिक गुजारा गर्न र पठनपाठनको जोहो गर्नकै लागि दाउरा बेच्न बाध्य भएका हुन् ।

दैनिक दिन विद्यालय सञ्चालन हुन्छ तर सो विद्यालयका विद्यार्थी एका बिहानै सदरमुकाम सिमकोट बजारमा दाउराको भारी बोकेर बेचेर कापी कलमको जोहो गर्नु परेको कक्षा ८ मा अध्ययनरत छात्र पुस्कल विकले पीडा पोख्नुभयो । दाउरा बोक्न जाने की पढ्न जाने , दाउरा बोक्न जाँदा विद्यालयको पठनपाठनबाट वञ्चित हुनु परेको उहाँले गुनासो गर्नुभयो ।

उहाँले घरको आर्थिक अवस्था अति कमजोर भएका कारण दैनिक दिन जङ्गलबाट दाउरा ल्याएर सदरमुकाम सिमकोटमा बिक्री गरी पढाइ र घरखर्च व्यवस्थापन गनुपर्ने बाध्यता रहेको बताउनुभयो ।
दैनिक दाउरा बेचेर खर्च जुटाउने गरेको बताउनु हुन्छ । जङ्गलबाट दाउरा ल्याई बजारमा बिक्री गरी त्यसबाट आएको रुपियाँले आफ्नो पढाइ र घरखर्च जुटाउनु परेको छ ।

सोही विद्यालयमा कक्षा ७ मा अध्ययनरत छात्र सविन्द्र शाहीले अघिल्लो दिन तयार पारेर राखेको दाउरा पछिल्लो दिन बिहानै दाउरा बोकी डेढ घण्टा लगाएर सिमकोट पुर्याएर बिक्री गर्ने गरेको बताउनुभयो । उहाँका अनुसार दाउरा बिक्री गर्ने क्रममा विद्यालयमा उपस्थित हुन नसक्ने गरेको  र पढाइ छुट्ने गरेकाे उहाँको भनाइ छ ।

घरको आर्थिक अवस्था कमजोर भएका कारण दाउरा बोकेर घरखर्च र पढाइ खर्चको व्यवस्था गर्ने गरेको बताउनुभयो । दाउरा बोकेर बिक्री नगरे घर चलाउन र पढाइ अगाडि बढाउन सकिँदैन, यो मेरो रहर नभएर बाध्यता रहेको बताउनु भयो ।

सिमकोटमा दाउरा प्रतिभारी ५ सय रुपियाँमा बिक्री हुने गरेको छ । विद्यालयका प्रधानाध्यापक मेजबहादुर बुढाले अधिकांश विद्यार्थीले दाउरा बेचेर घरखर्च र पढाइको व्यवस्था गर्नुपर्ने बाध्यता रहेको बताउनुभयो । उहाँले विद्यालयमा अध्ययनरत १ सय ५० विद्यार्थीले दैनिक दिन दाउरा बोकेर बिक्री गर्ने गरेको जानकारी दिनुभयो । घरको आर्थिक अवस्थाको कारण पढाइभन्दा दाउरा बोकेर बिक्री गर्ने कार्यमा बढी ध्यान दिने गरेका  र उक्त कामको लागि विद्यालय नआउँदा विद्यालयको पठनपाठन खस्कँदो अवस्थामा रहेको उहाँले बताउनुभयो ।

नन्द सिंह