आर्थिक अभावमा चुहिने घरमा बस्न बाध्य परिवारलाई इन्सेकको सहयोग

  ०८० वैशाख २७ गते

आर्थिक अभावका कारण जीर्ण घरमा बस्न बाध्य हुनु भएका मिक्वाखोला गाउँपालिका–४ साँवाका ५५ वर्षीय सुरेश लिम्बूको परिवारलाई इन्सेकले सहयोग गरेको छ ।

आर्थिक अभावका कारण फुसको छानो मर्मत गर्न नसक्नु भएका सुरेश लिम्बूको परिवारलाई इन्सेकले त्रिपाल सहयोग गरेको हो । इन्सेकको सहयोगपछि वर्षाको समयमा घरमा पार्नी चुहिने समस्या समाधान हुने सुरेश लिम्बूले बताउनु भयो ।

Photo 20230510 Taplejung (1)

Photo 20230510 Taplejung (2)

संविधानको धारा २७ मा आवासको हक सम्बन्धी व्यवस्था छ ।

सोही धाराको उपधारा १ मा प्रत्येक नागरिकलाई उपयुक्त आवासको हक हुने उल्लेख छ ।

तर, मिक्वाखोला गाउँपालिका–४ साँवाका ५५ वर्षीय सुरेश लिम्बूको घर संविधानमा व्याख्या भए बमोजिमको उपयुक्त छैन् ।

आर्थिक अभावका कारण सुरेशले जीर्ण फुसको छानो (खर) भएको घर मर्मत गर्न सक्नु भएको छैन । पानी परेको बेला आधा घरभित्र र आधा घरबाहिर पोखिन्छ । झट्ट हेर्दा लाग्छ, कि बसाई सरेको हुनुपर्छ नत्र कोही बस्दैनन् । तर यथार्थचाहिँ आर्थिक अभावकै कारण छानो छाउन नसक्नु हो । ५५ वर्षीय सुरेशसहित उहाँकी पत्नी, दुई छोरा र दुई छोरी चुहिने घरमा बसिरहनु भएको छ ।

इन्सेककर्मी वैशाख २६ गते सुरेश लिम्बूको घरमा पुग्दा १४ वर्षीया छोरी माया लिम्बुले भन्नुभयो ‘ममी र दिदी काम जानुभा,छ । दुई जना दाई पनि काममै जानुभा,छ । बुवाचाहिँ बाहिर बाहिरै हिड्नुहुन्छ ।’ बुवाको भर नभएको र आमासहित छोराछोरीको ज्याला मजदुरीमा घरव्यवहार चलेको छ ।

छानो छाउन नसक्दा न त घामपानी छेकिन्छ न त हावाहुरी नै । सुरेशकी पत्नीले भन्नुभयो्,‘पानी पर्दा त चुलोभित्रै पस्छ । लत्ता कपडा र अन्न भिज्छ । सुत्न त के पकाएर खान समेत समस्या हुन्छ ।’

गाउँपालिका अध्यक्ष भक्तबहादुर कार्कीले चालु आर्थिक वर्षभित्र जस्ता खरिद गर्न बजेट विनियोजन गरेको बताउनु भयो ।

अध्यक्ष कार्कीले भन्नुभयो,‘५ वर्षसम्म अघिल्लो स्थानीय तहका जनप्रतिनिधिले ध्यान दिन सकेन् । हामी यहि चालु आर्थिक वर्षमा खरिद गरिदिन्छौ ।’

सुरेश लिम्बूकै जस्तै मिक्वाखोला गाउँपालिकाभित्र १८ ओटा घरपरिवारका लागि जस्ता खरिद गर्न कार्यक्रम स्वीकृत गरिएको छ ।

सङ्घीय सरकारको जनता आवास कार्यक्रम अन्र्तगत जस्ताको छानाका लागि प्रति घर ५० हजार रुपियाँ उपलब्ध गराउने निर्णय सरकारको छ ।

तर, निर्णय कार्यान्वन प्रभावकारी नहुँदा सुरेश लिम्बूजस्ता विपन्न परिवार आवासको अधिकारबाट वञ्चित हुनु परेको छ ।


देवराज गुरूङ