समाचारहरू

व्याँस गाउँपालिकास्थित नुन विक्री डिपोमा आयोडिन नुन नहुँदा स्थानीय मार्कामा परेका छन् । गत असार महिनादेखि विक्री केन्द्रमा आयोडिन नुन नहुँदा डिपोमा पुगेका स्थानीयहरु रित्तो हात घर फर्किन बाध्य भएका छन् ।

अहिले स्थानीय गाउँमा ढिके नुन र भारतीय नुन प्रयोग गर्नु पर्ने अवस्था आएको छ । दार्चुला तिंकर सडक अवरुद्ध भएयता गाउँमा नुन पुगेको छैन, व्याँस गाउँपालिका–४ का नरेन्द्र भट्टले भन्नु भयो, भारतीय नुन प्रतिकिलो २५ रुपियाँमा किनेर खानु पर्ने अवस्था आएको छ ।

गाउँमा ढिके नुन पनि पाउनै मुस्किल छ । डिपोमा नेपाली आयोडिन नुन प्रतिकिलो नौ रुपियाँ पर्छ । तर, गाउँमा सडक बन्द हुँदा नुन आएको छैन् । खलंगाबाट व्याँस गाउँपालिको केन्द्र सुनसेर ४० किलोमिटरको दुरीमा पर्छ । केही व्यापारीले भारतीय नुन लिएर विक्री गर्ने गरेका छन् । भारतीय नुन नेपाली नुन भन्दा धेरै महंगो छ ।

नुन अभावले स्थानीयले हैरानी खेप्नुपरेको स्थानीय संग्राम विष्टले बताउनु भयो । गाउँमा नुन पाउनै नसकिने भएको छ । भारतीय बाटो हुँदै थोरै थोरै नुन बोकेर लिने गरेका छौँ उहाँले भन्नु भयो । नुनको समस्याबारे पटकपटक आग्रह गर्दा पनि सुनुवाई भएको छैन् ।

नुनको माग गर्दै नेपाली काङ्ग्रेसले व्याँस गाउँपालिकालाई ज्ञापन पत्र समेत बुझाएको एकसता वितिसक्दा समेत कुनै सुनुवाई नभएको नेपाली काङ्ग्रेसका नेता हरकसिंह विष्टले बताउनु भयो । जनतालाई चाहिने आधारभूत आवश्यकत्ता नुनको आपुर्तिको लागि पहल नहुँदा व्यासबासीले समस्या भोग्नुपरेको उहाँको भनाइ छ ।

व्याँस गाउँपालिका अध्यक्ष मंगलसिह धामीले नुन र खाद्यान्नको समस्याबारे साल्ट ट्रेडिङ् लिमिटेडलाई एक महिना अघि पत्रचार गरिएको बताउनु भयो । नुन तथा खाद्यान्न समाग्री समयमै  पु¥याउन जिल्ला प्रशासन कार्यालयमार्फत पत्रचार गरिएको भए पनि ठेक्का प्रक्रियामा ढिलाई हुँदा समस्या भएको उहाँले बताउनु भयो ।

नुनको अभाव व्याँसमा मात्र नभई जिल्लाका अन्य विक्री केन्द्रमा समेत भएको छ । एक महिनादेखि विक्री केन्द्रहरुमा नुन अभाव रहेको साल्ट ट्रेडिङ कर्पोरेसन लिमिटेड, दार्चुला डिपोका शाखा प्रमुख प्रेमसिह कुँवरले बताउनु भयो । स्थानीय तहमा रहेका नुन विक्री केन्द्रहरुमा गत असार महिनादेखि नुन अभाव छ ।

मालिकार्जुनको शंकरपुर, दुहुँ गाउँपालिकाको गरमोरा, अपि हिमाल गाउँपालिकाको ओखल, नौगाड गाउँपालिकाको होपरीगाडमा रहेको विक्री केन्द्रहरुमा नुन अभाव रहेको कुँवरले जानकारी दिनु भयो । नुन अभाव भएका क्षेत्रमा नुन ढुवानीका लागि टेण्डर प्रक्रियामा रहेको छ ।

नौगाडको होपरीमा ५ सय कोटा, मालिकार्जुनको शंकरपुर पस्तीमा २ सय कोटा, व्यासँको सुन्सेरा क्षेत्रमा १ सय ७० कोटा तथा दुहुँको गरमोरा क्षेत्रमा २ सय १० कोटा नुन ढुवानी हुने गरेको थियो । गाउँका विक्री केन्द्रमा नुन सकिएपछि अहिले सदरमुकाम खलंगा र गोकुलेश्वर विक्री केन्द्रबाट नुन विक्री भइरहेको छ । खलंगा डिपोले गत आर्थिक वर्ष २०७९ / ०८० मा २ हजार ८ सय २ क्विन्टल ५० किलोग्राम आयोडिन नुन विक्री वितरण गरेको जनाएको छ ।

नरेन्द्रसिह कार्की