समाचारहरू

राष्ट्रिय मानव अधिकार आयोगले तराई मधेसमा आन्दोलनकारीले अवरोध पुर्‍याएकोमा आपत्ति प्रकट गर्दै आन्दोलनकारीबाट भएको अवरोधको भत्सर्ना गरेको छ ।

तराई मधेसमा भएका आन्दोलनको अनुगमनका क्रममा २०७२ मङ्सिर १७ गते सर्लाहीमा बा.७ च. ७४७६ को गाडीमा आगजनी गरिएको, २०७३ फागुन २४ र २६ गते आयोगको अनुगमन टोलीले प्रयोग गरिरहेका क्रमशः बा.७ च. ७४७३ र बा.७ च. ७४७९ नम्बरका सवारी साधनमाथि सप्तरी जिल्लामा भएका तोडफोडका घटनाले आयोगलाई थप स्तब्ध बनाएको फागुन २६ गते जारी गरिएको विज्ञप्तिमा भनिएको छ ।

आन्दोलनको नेतृत्व गरिरहेको संयुक्त लोकतान्त्रिक मधेसी मोर्चाका नेताहरुद्वारा तोडफोड र आगजनी जस्ता घटना नदोहोरिने र आयोगले निर्वाध रूपमा अनुगमन गरिदिन भनी आयोगमा उपस्थित भई गरेको प्रतिबद्धता विपरीत यस्ता घटनाको पुनरावृत्तिले आयोगको स्वतन्त्र रूपमा अनुगमन गर्ने कार्यमा गम्भीर अवरोध सिर्जना गरेको विज्ञप्तिमा जनाइएको छ ।

'आयोगको अनुगमन टोलीमाथि आक्रमण गरी सवारी साधनसमेत तोडफोडमा संलग्न व्यक्तिहरूको पहिचान गरी कानूनी कारबाही गर्न आयोग नेपाल सरकारलाई आग्रह गर्दछ । साथै, यस प्रकारका हिंसात्मक गतिविधिले कहिल्यै पनि कसैको अधिकार संरक्षण नगर्ने हुँदा त्यस्ता कार्यहरू तत्काल बन्द गरी घटनाको छानबिनमा आवश्यक सहयोग पुर्‍याउन आयोग सम्बद्घ सबै पक्षहरूलाई आग्रह गर्दछ ।'-आयोगका सचिव वेदप्रसाद भट्टराईद्वारा जारी विज्ञप्तिमा भनिएको छ ।

अनलाइन डेस्क