समाचारहरू

राष्ट्रिय मानव अधिकार आयोगले मानव अधिकार उल्लङ्घनमा संलग्नलाई नेपाल सरकारद्वारा पदोन्नति र विभूषित गरिएकोप्रति गम्भीर ध्यानाकर्षण भएको जनाएको छ ।

आयोगले साउन ५ गते नेपाल प्रहरी प्रमुख तथा गृह मन्त्रालयका सहसचिवसँग छलफल गरी मानव अधिकारको गम्भीर उल्लङ्घन गर्ने कार्यमा संलग्नलाई  नै सरकारले पदोन्नति र विभिन्न विभूषण प्रदान गरिएकोप्रति आयोगको ध्यानाकर्षण भएको जनाएको हो ।

विभिन्न मितिमा गरिएका सिफारिसको सम्बन्धित निकायबाट कार्यान्वयन न्यून रहेकोप्रति पनि आयोग गम्भीर रहेको राससले जनाएको छ ।

सो अवसरमा आयोगका अध्यक्ष अनूपराज शर्माले आयोगद्वारा छानबिन गरी हत्या, बेपत्ता, यातनाजस्ता गम्भीर खालका मानव अधिकार हनन् र मानवीय कानुनको उल्लङ्घनजस्ता अपराधमा संलग्न दोषीको पहिचान गरी कानुनी कारबाहीका लागि नेपाल सरकारलाई सिफारिस गरेका व्यक्तिलाई नै पदोन्नति तथा विभूषित गरिनु दुःखद भएको बताए ।

सो अवसरमा प्रहरी महानिरीक्षक प्रकाश अर्यालले आयोगका निर्देशन तथा सिफारिसलाई संवेदनशील रुपमा लिई सम्बोधन गरिने प्रतिबद्धता व्यक्त गरे ।

अनलाइन डेस्क