आयुर्वेद औषधालयमा डेढवर्ष देखि डाक्टर विहिन, सेवाग्राही मर्कामा

साविकको कर्णाली अञ्चल आयुर्वेद औषधालय जुम्ला करिव डेढ वर्षदेखि डाक्टर विहीन भएपछि सेवाग्राही मर्कामा परेका छन् ।

यहाँ कार्यरत डाक्टर रमेश केसी ०७२ मङ्सिर महिनामा सरूवा भई गएपछि औषधालय डाक्टर विहीन भएका हो ।

आयुर्वेद औषधालयका निमित्त प्रमुख वरिष्ठ बैद्य नन्दबहादुर न्यौपानेले करिव १८ महिना औषधालयमा डाक्टर नभएपछि शल्याक्रियाका काम हुन नसकेको बताए । उनले भने-'न्यूतम शुल्कमा पाइल्स, घाउखटिराका शल्यक्रिया गर्ने गरेका थियौँ । अहिले डाक्टर नभएपछि त्यो काम हुन सकेको छैन ।'

फागुन/चैत्र महिनादेखि पसिना निकाल्ने(बाफ निकाल्ने) सेवा सुरू गर्ने भनिए पनि इन्धन अभावका कारण सेवाप्रवाह गर्न नसकिएको अञ्चल आयुर्वेद औषधालय जुम्लाले जनाएको छ ।

यहाँ दैनिक २०/२५ जना जति सेवाग्राही सेवा लिन आउने गरेका सो औषधालयले जनाएको छ । विशेषगरी ज्येष्ठ नागरिकहरू पसिना निकाल्ने सेवा लिनका लागि डोल्पा, मुगु र कालिकोट जिल्लाबाट आउने गरेपनि सेवा नभएपछि त्यत्तिकै फर्केर जाने गरेका छन् ।

औषधालयमा ६ जनाको दरबन्दी भएपनि अहिले एक जना डाक्टर र एक जना सहलेखापाल रिक्त रहेको निमित्त प्रमुख वरिष्ठ बैद्य न्यौपानेले बताए । औषधि खर्चका लागि वार्षिक ४ लाख ५० हजार रुपियाँ जति रकम निकासा हुने भएपनि उक्त रकम अपुग नै हुने गरेको उनले बताए ।


मानदत्त रावल