समाचारहरू

कारागारका कैदी बन्दीहरूले आयआर्जनका लागि उद्यम सुरु गरेका छन् । सल्यान कारागारभित्र विभिन्न उद्यम गरी मासिक २५ हजार रुपियाँसम्म आम्दानी गर्न थालेको कैदी बन्दीले बताएका छन् । कैदी बन्दीहरूले मुडा र टोकरीलगायतका बाँसजन्य सामग्री उत्पादन गरी मासिक २५ हजार रुपियाँसम्म आम्दानी गर्न थोलेका हुन् ।

कैदी बन्दीहरूले दिनभरी बाँसबाट बनाउने मुडा, टोकरी, डालो, टोपीलगायतका सामग्री तयार गर्ने गरेको जिल्ला कारागार सल्यानका जेलर विक्रम केसीले बताए । जेलर केसीले भने-'कैदी बन्दीले मासिक २५ हजार रुपियाँभन्दा बढी उनीहरूले उत्पादन गरेका सामग्री विक्री गरेर कमाउने गरेका छन् ।'

कैदी बन्दीलाई आवश्यक पर्ने बाँसलगायतका कच्चा पदार्थ जिल्ला कारागार सल्यानको पहलमा ल्याउने गरिएको छ । 'धेरै कैदीहरू छौँ । आफूले जानेको सिप नयाँ आएका कैदीलाई पनि सिकाउँछौँ -।' २४ वर्षीय कैदी महेन्द्र थापाले भने-'आफूले जानेको सिपबाट २/४ पैसा आम्दानी हुन्छ भने किन नगर्नु भनेर काम गरिरहन्छौँ ।'

आफूहरूले कमाएको पैसाले आफ्नो खर्च टार्ने गरेको र कतिपयले घरमा समेत पठाउने गरेको कैदी थापाले बताए । कैदी थापाले आफूहरूलाई कसैले अझ यसबारेमा तालिम लिने हो भने आफूहरूले धेरै कमाउन सक्ने बताए । अब महिलालाई उनीहरूको क्षमता अनुसारका सिप विकास तालिम दिने र अझ नयाँ नयाँ प्रविधिसहितका सिप सिकाउने हो भने अझै बढी कमाउन सकिने थापाले बताए ।

कैदीले उत्पादन गरेका वस्तुको बजारको समस्या नरहेको जेलर केसीले बताए । कैदीले उत्पादन गरेका सामान खलङ्गा र श्रीनगरलगायतका बजारमा जाने गरेको र कतिपय कारागारमा पुगेर किनेर लैजाने गरेको उनले बताए । हाल जिल्ला कारागार सल्यानमा ६५ जना कैदी र २२ जना बन्दी रहेका छन् ।

यसैगरी जिल्ला कारागारका कैदीले जिल्ला कारागारमा पुस्तकालयको स्थापना गरिदिन विभिन्न निकायलाई आग्रह गरेका छन् । कैदीहरूले कारागार भित्र आफूहरूलाई दिन काट्न मुस्किल हुने हुँदा पुस्तकहरू उपलव्ध गराइदिन आफूहरूलाई सजिलो हुने कैदीहरूले बताए । जिल्ला कारागार सल्यानका जेलर बिक्रम केसीले कारागारमा पुस्तकालय स्थापनाको लागि पहल गरिदिन पत्रकार तथा अधिकारकर्मीलाई अनुरोध गरे ।

मिना बुढाथोकी