आफैँले दिएको उजुरी विपरीत वकपत्र गर्ने महिलालाई एक महिना कैदको फैसला

  ०७४ असार २३ गते

आफैँले दिएको बलात्कारसम्बन्धी मुद्दाको विपरीत अदालतमा वकपत्र गर्ने एक महिलालाई दैलेख जिल्ला अदालतले एक महिना कैदको फैसला गरेको छ ।

महाबु गाउँपालिका-५ का २३ वर्षीय दीपक पाण्डेले बलात्कार गरेको भनी भदौ ४ गते दैलेख अदालतमा उजुरी दिएकी ती महिलाले अदालतमा आफैँले दिएको जाहेरी विपरीत 'होष्टाइल' भएपछि अदालतले सो सजाय गरेको जनाएको छ ।

जिल्ला न्यायाधीश प्रकाशप्रसाद पण्डितको इजलासबाट असार २३ गते भएको फैसलामा घटना परिवेश, प्रमाण विपरीत सरकारी साधन, श्रोत र जनशक्तिको समेत दुरूपयोग भएको ठहर गर्दै जाहेरवाला महिलालाई एक महिना कैदको फैसला भएको अदालतका श्रेस्तेदार रमेश श्रेष्ठले बताए ।

बाँसीको मालिकाथानमा ०७३ भदौ १ गते ती महिलाले आफू बलात्कार भएको भन्दै प्रहरीमा उजुरी दिएकी थिइन् ।

महिलाले उजुरी दिएपछि फरार आरोपित पाण्डे ०७३ फागुनमा अदालतमा हाजिर हुँदा पुर्पक्षका लागि थुनामा राखिएको थियो ।


अमर सुनार