आन्दोलन गरेको आरोपमा प्रहरीद्वारा कुटपिट गरेको आरोप

  ०७३ असोज १७ गते

अत्तरिया नपा-१३ का ३२ वर्षीय लोकराज पाण्डेय, सोही नपा-४ का पदम ओझा र वडा नं ३ का बालकृष्ण ओझालाई वन हस्तान्तरणको विरोध गरेको आरोपमा प्रहरीले कुटपिट गरेको पीडितहरूले गुनासो गरेका छन् ।

जिल्ला वन कार्यालय, कैलालीले अत्तरिया नपा-१३ स्थित मस्जिद मदरसा इदगाह मुस्लिम सामुदायिक वन मुस्लिम समुदायलाई हस्तान्तरण गरेको विरोधमा आन्दोलन गरेको आरोपमा प्रहरीले आफूहरूलाई कुटपिट गरेको उनीहरूले गुनासो गरेका हुन् ।

असोज १७ गते धनगढी उमनपा-५ स्थित बजारमा रहेको जिल्ला वन कार्यलय, कैलालीमा ज्ञापनपत्र बुझाउन गएको अवस्थामा प्रहरीले गिरफ्तार गरी कुटपिट गरेको पीडित लोकराज पाण्डेयले आरोप लगाए ।

जिल्ला प्रहरी कार्यलय, कैलालीका एसपी राजेन्द्र विष्टले आन्दोलनका कारण यातायात सञ्चालनमा अवरोध हुन पुगेको र सोही अवरोध खुलाउने क्रममा तीन जना आन्दोलनकारीलाई दुई घण्टा नियन्त्रणमा लिएर छोडेको बताए । उनले भने-'नियन्त्रणमा लिने क्रममा धकेलाधकेल हुँदा केही आन्दोलनकारी घाइते भए । हामीले नियन्त्रणमा लिएर कुटपिट गरेका छैनौं ।'


सुमित्रा भट्टराई