समाचारहरू

प्रदेश १, सरकारको आर्थिक वर्ष २०७९-८० को स्वीकृत वार्षिक बजेट तथा कायक्रम बमोजिम जनयुद्ध, दोश्रो जनआन्दोलन, मधेस आन्दोलन र जनजाति आन्दोलनमा सहादत प्राप्त गर्ने परिवारलाई १ लाख रुपैयाँ दिने कार्यक्रमका लागि जिल्लाबाट १ सय ५१ जनाले निवेदन दिएका छन् ।

उक्त आन्दोलनका क्रममा सहादत प्राप्त गर्ने परिवारलाई रकम उपलब्ध गराउने कार्यविधि,२०७९ मा व्यवस्था भए अनुसार प्रदेश १, मा स्थायी बसोबास गर्नेलाई १ लाख रुपियाँ उपलब्ध गराउने व्यवस्था बमोजिम निवेदन माग गरिएको थियो ।

पुस ९ गतेदेखि ३० दिनको अवधिसहितको सूचना प्रकाशन गरी माग गरिएको निवेदनमा ५८ जना महिला र ९३ जना पुरूष गरी १ सय ५१ जनाले निवेदन दिएको जिल्ला प्रशासन कार्यालयका नायब सुब्बा कुलमणि दाहालले बताउनु भयो ।

प्रमुख जिल्ला अधिकारी महेशकुमार पोखरेलले ३० दिनको म्यादमा सङ्कलन भएका निवेदन र कागजात प्रदेश सरकारलाई पठाएपछि भुक्तानी प्रक्रिया तय गर्ने प्रावधान छ ।

प्रमुख जिल्ला अधिकारी पोखरेलले भन्नुभयो ‘निवेदन दिएका सबै जनआन्दोलनमा मृत्यु भएकाको परिवार सदस्य हुन् । सूचनामा माग भएबमोजिमको कागजात संलग्न छन् ।’ सङ्ख्याअनुसार १ लाखका दरले १ करोड ५१ लाख रुपियाँ भुक्तानी हुन्छ ।

सबैको बैङ्क खाता उपलब्ध भएकाले भुक्तानी प्रक्रिया बैकिङ्क प्रणालीबाट हुने जिल्ला प्रशासन कार्यालयले जनाएको छ ।

देवराज गुरुङ