समाचारहरू

राज्यको पुनःसंरचना संशोधन प्रस्ताव ल्याएको विरोधमा तेस्रो दिन पनि रुपन्देहीको बुटवल क्षेत्रमा गरिएको प्रदर्शनका कारण यहाँको जनजीवन प्रभावित बनेको छ ।

प्रदर्शनकारीहरूले बिहानैदेखि बुटवलका विभिन्न चोकहरू, अस्पताल लाइन, मिलनचोक, गोलपार्क पुष्पलाल पार्क, ट्राफिक चोक, राजमार्ग चौराहा र नेपालगञ्ज रोडमा टायर बालेर प्रदर्शन गरेका थिए ।

अनेरास्ववियु, नेविसङ्घ, अखण्ड प्रदेश नं ५ प्रदेश दबाव अभियान रुपन्देही, अखिल छैठौँलगायतका सङ्गठनहरूले संयुक्त रूपमा मङ्सिर १७ गते बिहानैदेखि नारावाजी गरी प्रदर्शन गरेका थिए ।

बन्दका कारण लामो तथा छोटो दुरीका सवारी साधनहरू आज पनि ठप्प रहे भने यस क्षेत्रका बजार उद्योग धन्दा, कलकारखाना, शैक्षिक संस्थाहरू र औषधि पसलसमेत पूर्ण रूपमा बन्द रहे ।

एम्बुलेन्स, विवाह, सञ्चार, मानव अधिकारकर्मीका सवारीसाधन तथा तरकारी र दुध बोक्ने गाडीहरूलाई भने आन्दोलनकारीले रोकतोक गरेका थिएनन् ।

बन्दकर्ताले तेस्रो दिन पनि सुरक्षाकर्मीमाथि ढुङ्गा प्रहार गरेपछि केहीबेर स्थिति तनावग्रस्त भएको थियो । बन्दकर्ताले ढुङ्गा प्रहार गरेपछि प्रहरीले केही समूहलाई लाठी चार्ज समेत गरेको थियो ।

अखण्ड ५ नं प्रदेश दबाव अभियान लुम्बिनीका संयोजक विष्णु पोख्रेलले निर्णय नसच्चाएसम्म आन्दोलन जारी राख्ने बताए ।

बन्दका कारण कुनै किसिमको क्षति नभएको इलाका प्रहरी कार्यालय बुटवलका डिएसपी मुकुन्द मरासिनीले जानकारी दिए ।

जनसभालाई नेताद्वारा सम्बोधन

५ नं प्रदेशलाई कुनै पनि हालतमा टुक्र्याउन नदिने नेताहरूले चेतावनी दिएका छन् । बुटवलको ट्राफिक चोकमा आयोजित विशाल जनसभालाई सम्बोधन गर्दे सत्तारुढ दलकै नेताहरूले प्रदेश विभाजन गर्ने प्रस्ताव आफूहरूलाई मान्य नभएको भन्दै सरकारको कडा आलोचना गरेका छन् ।

जनसभालाई सम्बोधन गदै एमाले उपमहासचिव विष्णु पौडेलले सरकारले कसैको आदेश तामेली गरेकोले यस प्रस्तावको औचित्वलाई पुष्टि गर्न प्रधानमन्त्री पुष्पकमल दाहाललाई जनताको माझमा आउन आग्रह गरे ।

एकीकृत माओवादी केन्द्रका नेता टोपबहादुर रायमाझीले ५ नं प्रदेश कसका लागि टुक्र्याउन खोजिएको भन्दै सरकारलाई प्रतिप्रश्न गरे । रायमाझीले आफू पार्टीभन्दा माथि रहेर जनताको पक्षमा हिँडेको बताउँदै जनता रहेमा मात्र जनप्रतिनिधि, संसद र सरकार रहने बताए ।

नेपाली काङ्ग्रेसका केन्द्रीय सदस्य एवम् सांसद चन्द्र भण्डारीले प्रदेश नं ५ मा गिद्धे नजर नलगाउन आग्रह गर्दै जनताको भावनालाई खेलवाड गर्ने अधिकार कसैको नभएकोले प्रस्ताव फिर्ता लिन सरकारलाई सुझाए ।

सरकारले जनताको भावना विपरित कदम चालेको भन्दै प्रस्ताव फिर्ता नल्याएसम्म आफूहरूले सडक र सदन दुवै तताउने बताए ।

नेविसङ्घद्वारा जनमत सङ्ग्रह

नेविसङ्घले प्रदेश नं ५ लाई टुक्र्याउने वा नटुक्र्याउने भन्ने विषयमा बुटवलमा जनमत सङ्ग्रह गरेको छ । कुल १८ हजार २ सय ८३ मत खसेको मध्ये १७ हजार ५ सय ४५ मत प्रदेश टुक्र्याउन हुँदैन भन्नेमा र ५ सय ४८ मत टुक्र्याउन हुन्छ भन्ने पक्षमा तथा १ सय ९० मत बदर भएको निर्वाचन कार्यक्रमका संयोजक ठाकुर घिमिरेले बताए । सङ्कलित मतलाई प्रधानमन्त्री र सभामुखसमक्ष पठाउने नेविसङ्घले जनाएको छ ।

रीमा विसी