समाचारहरू

संयुक्त ट्रेड युनियन सङ्घर्ष समितिले काम नै अवरुद्ध गरी धर्नामा बसेपछि बालबालिकाले फागुन ७ र ८ गते पोलियो थोपा खानबाट वञ्चित भए ।

कर्मचारीहरूको आन्दोलनका कारण फागुन ७ र ८ गते देशभर खुवाइने भनिएको पोलियो खोप अभियान नै स्थगित गरिएको थियो ।

सरकारले स्वास्थ्य सेवा ऐनको दफा ९ (ख) कार्यान्वयन तथा पद व्यवस्थापन नगरेको भन्दै कर्मचारीहरुले फागुन ३ गतेदेखि जिल्ला जनस्वास्थ्य कार्यालयको मूल ढोकामा तालाबन्दी गरी आकस्मिक सेवा वाहेक सम्पूर्ण कार्य अवरुद्ध गर्दै धर्नामा बसेका छन् ।

आन्दोलनका कारण जिल्लाका अस्पतालसहित चार प्राथमिक स्वास्थ्य केन्द्र र एक सय १२ स्वास्थ्य चौकीमा सेवा ठप्प छ । औषधी अभावपछि स्वास्थ्यकर्मीहरूको आन्दोलनले सर्वसाधारण मर्कामा परेका छन् ।

आकस्मिक सेवा बाहेक राष्ट्रिय कार्यक्रमहरू तथा जिल्लाका नियमित कार्यक्रम, तालिम, गोष्ठि, करार सेवा नियुक्ति, औषधि खरिद, बालबालिकालाई लगाइने नियमित खोपलगायत कार्यक्रमहरूसमेत हुन सकेको छैन । नियमित खोपबाट वञ्चित बालबालिकाको स्वास्थ्यमा दीर्घकालीन असर पर्ने जिल्ला जनस्वास्थ्य कार्यालयका सिनियर अहेव गङ्गाप्रसाद यादवले बताए ।

आन्दोलनरत संयुक्त ट्रेड युनियन सङ्घर्ष समितिले जिल्ला जनस्वास्थ्य कार्यालय सप्तरीमा जारी राखेको धर्नामा फागुन ८ गते आएकी व्यवस्थापिका संसद महिला, बालबालिका, ज्येष्ठ नागरिक तथा समाज कल्याण समितिकी सभापति रञ्जु झाले स्वास्थ्यकर्मीहरूको माग पुरा गराउन सहयोग गर्ने प्रतिबद्धता जनाइन् । उनले आफ्ना जायज मागसँगै बिरामीको पनि उत्तिकै ख्याल गर्न आग्रह गरिन् ।

मनोहरकुमार पोखरेल