समाचारहरू

बागलुङको निसीखोला गाउँपालिका–३ की २५ वर्षीया सम्झना मल्ललाई आत्महत्या गर्न बाध्य बनाएको आरोपमा जिल्ला अदालत बागलुङले ३३ वर्षीय जेठाजु थम्मनबहादुर मल्ललाई १ वर्ष कैद सजाय फैसला गरेको छ । सम्झना ०७६ असोज २२ गते राती झुण्डिएको अवस्थामा मृत भेटिएकी थिइन् ।

सम्झानाका दाजु निसीखोला गाउँपालिका–३ का ३० वर्षीय तुलबहादुर शाहीले बहिनीको मनसायपूर्वक हत्या गरिएको भन्दै जेठाजुहरू थम्मनबहादुर मल्ल, मेघध्वज मल्ल र जेठानी मिठुकुमारी मल्ल विरूद्ध ०७६ असोज २४ गते उजुरी दिएका थिए ।

जिल्ला न्यायाधीश दिवाकर भट्टको ०७९ पुस १९ गतेको अन्तिम आदेशले आंशिक अभियोग दावी पुग्ने भन्दै थम्मनलाई कैदसँगै २५ हजार रुपैया जरिवाना फैसला गरेको छ। भने मेघध्वज र मिठुकुमारीलाई सफाई दिएको छ ।

अदालतको अन्तिम आदेशमा मृतक सम्झनालाई आरोपितले कुटपिट गरि झुण्डाएर हत्या गरेको अभियोगमा सफाई पाएका छन् । तर, झुण्डिएर मर्न बाध्य बनाएको कसुरमा थम्मनबहादुर मल्ललाई आत्महत्या दुरुत्साहन अभियोग अनुसार कैद सजाय फैसला गरेको जिल्ला अदालत बागलुङका श्रेष्तेदार सुर्यप्रसाद भण्डारीले बताउनुभयो ।

सिर्जना पन्त