समाचारहरू

महोत्तरी जिल्ला बर्दिबास नगरपालिका-८ हातिलेट घर भई कमलामाई नगरपालिका-४ फाटमा बस्दै आएकी २४ वर्षीया जमुना गोलेले सोही ठाउँमा बस्ने पति सञ्जिव श्रेष्ठको कुटाई सहन नसकेर आत्महत्या गरेको आरोपमा श्रेष्ठविरुद्ध ०७९ फागुन २९ गते प्रहरीमा उजुरी परेको छ ।

श्रेष्ठको कुटाई सहन नसकेर गर्भवती जमुनाले फागुन २८ गते आत्महत्या गर्नु परेको भन्दै जमुनाका बुबा सोमबहादुर गोलेले फागुन २९ गते जिल्ला प्रहरी कार्यालय सिन्धुलीमा उजुरी दिनुभयो ।

घटनापछि फरार रहेका आरोपित श्रेष्ठको खोजी भई रहेको जिल्ला प्रहरी कार्यालय सिन्धुलीको एसपी राजकुमार सिलवालले बताउनु भयो ।

शवको पोस्टमार्टम फागुन २९ गते सिन्धुली अस्पतालमा गरिएको थियो ।

आरोपित श्रेष्ठलाई गिरफ्तार गरि कानुनी कारबाही गर्ने सहमतिपछि पीडित पक्षले शव बुझेका थिए ।

प्रहरीले घटनाको प्रारम्भिक अनुसन्धान सुरु गरेको बताउँदै आरोपितलाई कानुनी कारबाही हुने एसपी सिलवालले प्रतिबद्धता व्यक्त गर्नुभयो ।

तीन महिनाकी गर्भवती जमुनाले आत्महत्या गर्नुको कारण अनुसन्धानपछि मात्र भन्न सकिने एसपी सिलवालले जानकारी दिनुभयो ।

नबिनबाबु अधिकारी