समाचारहरू

मध्यपुरथिमी नगरपालिका–१ मनहरामा बस्ने एक महिलालाई २०७६ चैत ५ गते कुटपिट गरि आत्महत्या गर्न बाध्य पारेको आरोपमा प्रहरीले तीनजनालाई गिरफ्तार गरेको छ ।
महानगरीय प्रहरी वृत्त थिमिको टोलीले धादिङ खानीखोला गाउँपालिका–१० घर भई मध्यपुरथिमी–१ लोकन्थली बस्ने ३६ वर्षीया अप्सरा बास्कोटा, ताप्लेजुङ तेलोक गाउँपालिका–२ घर भई लोकन्थली बस्ने ३४ वर्षीया सुनिता सुब्बा र ताप्लेजुङ तेलोक गाउँपालिका–२ घर भई लोकन्थली बस्ने १८ वर्षीय एनिहा सुब्बालाई उनीहरूको घरबाटै गिरफ्तार गरी हिरासतमा राखेर अनुसन्धान सुरु गरेको प्रहरी नायब उपरीक्षक दीपक गिरीले जानकारी दिनुभयो ।
खोटाङ दिक्तेल नगरपालिका–३ पिनालाखा घरभई हाल मनहरामा १८ वर्षीय छोरा अनिस राईसँगै कोठा भाडामा बस्दै आएकी ३५ वर्षीय बिमला राईको चैत ५ गते आफ्नै कोठामा झुण्डिएर आत्माहत्या गरेको अवस्थामा शव भेटिएको प्रहरीको भनाई छ । घटनास्थलमा पुगेको प्रहरी टोलीले मृतकको शवलाई परीक्षणको लागि त्रिवि शिक्षण अस्पताल महाराजगञ्ज पठाइएको डिएसपी गिरीले बताउनु भयो ।
अनुसन्धानकै क्रममा मृतकको छोरा अनिस राईले मेरो आमालाई कुटपिट गरि शारीरिक तथा मानसिक याताना दिई आत्महत्या गर्न बाध्य गराएको भन्दै तीनजनाको नाममा महानगरीय प्रहरी वृत्त थिमीमा किटानी जाहेरी दिनुभएको थियो ।

रमेश गिरी