समाचारहरू

नयाँबानेश्वरस्थित सङ्घीय संसद भवन अगाडि पेट्रोल छर्किएर आगो लगाएर आत्मदाह प्रयास गरेका इलामको सूर्योदय नगरपालिका निवासी ३७ वर्षीय प्रेमप्रसाद आचार्यको उपचारका क्रममा कीर्तिपुरस्थित बर्न अस्पतालमा ०७९ माघ ११ गते मृत्यु भएको छ ।

आचार्यले माघ १० गते सङ्घीय संसद भवन अगाडि नयाँबानेश्वर चोकमा आफ्नो शरीरमा पेट्रोल खन्याएर आगो लगाएका थिए । आगलागीपछि घाइते भएका आचार्यलाई प्रहरीले उद्धार गरेर उपचारका लागि कीर्तिपुरस्थित बर्न अस्पताल लगेको थियो ।

आचार्यको उपचारका क्रममा माघ ११ गते बिहान मृत्यु भएको जिल्ला प्रहरी परिसर काठमाडौँका प्रवक्ता एसपी दिनेशराज मैनालीले जानकारी दिनुभयो ।

आत्मदाह गर्नुअघि आचार्यले फेसबुकमा लामो स्टाटस लेख्दै उनले यो देशमा गरिखाने वातावरण नभएकोले आफूले मृत्यु रोज्न खोजेको लेखेका थिए ।

उनले राज्यको नीतिको कारण देशमा आम युवाले गरिखाने वातावरण नभएको र विदेश पलायन हुन बाध्य भएको भन्दै सरकारको तिव्र आलोचना गर्दै निराशा प्रकट गरेका छन् । उनको आत्मदाह राज्यको कमजोर आर्थिक नीति र युवामैत्री उद्यमशीलना नभएको अनुको सामाजिक सञ्जालमा आएको स्टाटसमा देखिएको इन्सेक बागमती प्रदेश संयोजक गणेश भण्डारीले बताउनु भयो ।

घटनाप्रति इन्सेक प्रतिनिधिलाई प्रतिक्रिया दिँदै इलाम प्रतिनिधि सभा क्षेत्र नं १ का संसद महेश बस्नेतले देशमा केही गर्छु भन्ने युवकले आत्मदाहा गर्ने परिस्थिति सृजना हुनु दुखद भएको र आगामी दिनमा यस्ता घटना हुन नदिनका लागि मृतकले उठाएका विषयका बारेमा राज्यले गम्भीर भएर सम्बोधन गर्नुपर्ने बताउनुभयो ।

विमल पौडेल