समाचारहरू

आठ वर्षीया बालिकाको शव फेला परेको छ । रूपाकोट मझुवागढी नगरपालिका-१० पाथेकाका नौमणी राईकी आठ वर्षीया छोरी लुमणीको शव चिम्चिमा खोलाको बगरमा गाडिएको अवस्थामा माघ १० गते फेला परेको हो ।

माघ १० गते दिउँसोदेखि हराएकी बालिकाको खोजी गर्ने क्रममा हत्या गरेर घर नजिकैको खोलाको बगरमा गाडिएको अवस्थामा शव फेला पारिएको स्थानीयले बताएका छन् ।

हत्या आशङ्कामा प्रहरीले सोही स्थानका १६ वर्षीय बालकलाई माघ ११ गते गिरफ्तार गरेको छ । घटनाको विस्तृत जानकारी आउन बाँकी रहेको जिल्ला प्रहरी कार्यालय खोटाङका डिएसपी लोकदर्शन थापाले बताए ।

'गिरफ्तार गरिएका आरोपितले आफैँले बालिकाको हत्या गरेको स्वीकारेका छन् ।'-उनले भने-'के कारणले बालिकाको हत्या गरिएको हो भन्नेबारे अझै बुझ्न बाँकी रहेको छ ।'

स्थानीयले भने आरोपित बालकले बालिकाको बलात्कारपछि हत्या गरेर लुकाउनका लागि खोलाको बगरमा गाडेको हुनसक्ने आरोप लगाएका छन् । बालिकाको शवको पोष्मार्टम जिल्ला अस्पताल दिक्तेलमा आजै भएको छ ।

सुनिता मगर