आठ वर्षदेखि विद्यार्थी जस्ताको टहरामा अध्ययन गर्न बाध्य

कालिञ्चोक गाउँपालिका वडा नं. ५ स्थित कालिञ्चोकस्थित लामिलाङ माध्यमिक विद्यालयका विद्यार्थी २०७२ बैशाखमा गएको भूकम्प पश्चात् आठ वर्षदेखि जस्ताको छाना र जस्ताकै बारले बनाएको टहरामा अध्ययन गर्न बाध्य छन् ।

लापिलाङ माध्यमिक विद्यालयका प्रधानाध्यापक दीपक खड्काका अनुसार भूकम्पपछि विद्यालय भवन निर्माणमा ठेकेदारले ढिलासुस्ती गरेको कारण जस्ताको छाना र जस्ता कै पाताबाट बारेको टहरामा अध्यापन गरांउनुपर्दा शिक्षक विद्यार्थी सबैले असहजता भोग्नु परेको हो ।

Photodolakha२०७९०५२३

जस्ताको बारका कारण एउटा कोटामा पढाएको आवाज सबै कोठामा जाने र विद्यार्थीहरुले नबुझ्ने साथै शिक्षकलाई पनि भार पर्ने प्रधानाध्यापक खड्काले बताउनु भयो ।

हाल अध्यापन गराउँदै आएको टहरा पनि विद्यालयले नै वार्षिक ३२ हजार रुपैयाँ भाडामा जग्गा लिएर बनाएको हो ।

कक्षा ६ देखि १२ सम्म एक ठाउँमा र कक्षा १ देखि ५ सम्म अर्को ठाउँमा अलि टाढा कक्षा सञ्चालन गरिएको छ ।

जस्ताको छाना र बार समेत जस्ता कै भएको कारण हिउँदमा चिसोका कारण विद्यार्थी बिराम हुंने, चैत बैशाखमा गर्मीले बालबालिकाहरूलाई रिंगटा लाग्ने, बान्ता हुने र बिरामी पर्ने समस्या छ ।

साथै वर्षाको समयमा अध्यापन गराएको जस्ताको आवाजले नसुनिने हुँदा पानी पर्ने बित्तिकै विद्यालय बन्द गर्नुपरेको सोही विद्यालयका शिक्षक धनिराम अधिकारीले बताउनु भयो ।

जस्ताका छानामुनीको अध्यापनले विद्यार्थी र शिक्षकमा समयसमयमा शारीरिक अस्वस्थता हुने र समयमा पाठ्क्रम समेत नसकिने गरेको छात्र बिपिन खड्काले बताउनु भयो ।

छात्र खड्काले विद्यालय भवन बन्दै गरेको अवस्थामा भए पनि अझै कति समय लाग्छ भन्ने टुङ्गो नहुँदा यो समस्या वर्सौदेखि लम्बिदै गएको गुनासो गर्नु भयो ।

एडिबिको सहयोगमा २२ कोठे विद्यालय भवन निर्माणको अन्तिम चरणमा पुगेको र भवन हस्तान्तरण पछि अध्यापनमा सहजता आउने प्रधानाध्यापक खड्काले बताए ।


उद्धव पोखरेल