आचारसंहिता विपरीत सडकको शिलन्यास गरेको भन्दै उजुरी

  ०७४ जेठ २४ गते

नेपाली काङ्ग्रेसका महाकाली नगरपालिकाका मेयर पदका उम्मेदवार हंशराज भट्टसहितको टोलीले नगरपालिकाको श्रीवगड कोट कौतली सडक खण्डको जेठ २३ गते शिलान्यास गरेको भन्दै नेकपा एमाले दार्चुलाले मुख्य निर्वाचन अधिकृतको कार्यालयमा उजुरी दर्ता गरेको छ ।

निर्वाचनको क्रममा कुनैपनि योजनाहरूको शिलान्यास उद्घाटन गर्न नपाइने भएपनि उम्मेदवारसहितको टोलीले सडक शिलान्यास गरेपछि जेठ २४ गते उजुरी दर्ता गरेको हो ।

महाकाली नगरपालिका अन्तर्गत नगर क्षेत्र पूर्वाधार विकास कार्यक्रमको ५० लाख रुपियाँमा निर्माण गरिन लागेको सडकको शिलान्यास भएको हो । शिलान्यास कार्यक्रममा काङ्ग्रेस महाकाली नगरपालिका नगर प्रमुख जयदेव जोशी, महाकाली नगरपालिकाका इन्जीनियर मुकेश पाठकसमेतको उपस्थिति रहेको एमालेको आरोप छ ।

आचारसंहिताको परिच्छेद ३ को २ मा नेपाल सरकार सार्वजनिक संस्था र स्थानीय तहले कुनैपनि नयाँ योजनाको शिलान्यास गर्ने, उद्घाटन गर्ने, सर्वेक्षण गर्ने, अध्ययन वा सोको लागि अनुदान दिने जस्ता कार्यक्रम गर्न नपाइने उल्लेख छ ।

नगरपालिकाबाट विनियोजित बजेटबाट सरकारी कर्मचारीको उपस्थितिमा नगरपालिकाका मेयर पदका उम्मेदवारले शिलान्यास गर्नु मतदाता प्रभावित गर्ने कार्य भएको एमाले जिल्ला कमिटी सचिव ज्ञानेन्द्र घर्तीले बताए ।

उक्त क्षेत्रमा सडक शिलान्यास गरेर काङ्ग्रेसले बजेट ल्याएको भन्दै भाषण गरेर मतदाता प्रभावित गर्न खोजेको घर्तीको आरोप छ । काङ्ग्रेस नगर प्रमुख जोशीले सडक आफ्नो पहलमा ल्याएको कार्यक्रममा बताएको केही पत्रिकाले समेत उल्लेख गरेका छन् ।

नगरपालिकामा उक्त योजना झण्डै एक महिनाअघि सम्झौता भएको थियो । नगर क्षेत्र पूर्वाधार विकास कार्यक्रम अन्तरगत उक्त क्षेत्रमा सडक निर्माण हुन लागेको हो । नगरपालिकाले भने सडकको शिलान्यास नगरको आयोजनामा नभएको स्पष्ट पारेको छ । हामीले आफैँ सडक शिलान्यास गर्ने तयारी गरेको बेला काङ्ग्रेसको प्रचार टोली आएर शिलान्यास गरेको जनाएको छ । सडक निर्माणको लागि ५० लाख रुपियाँ सडक बोर्डको सहयोग र २५ प्रतिशत जनश्रमदानमा निर्माण भइरहेको जनाइएको छ ।

मुख्य निर्वाचन अधिकृतको कार्यालयले भने उजुरीको सम्बन्धमा छानबिन सुरू गरेको जनाएको छ । आचारसंहिता उल्लङ्घनबारे अनुगमन समितिका सदस्य निरञ्जन स्थापितलाई जिम्मेवारी दिइएको मुख्य निर्वाचन अधिकृत दुर्गाबहादुर भुसालले बताए ।

अनुसन्धानमा संग्लन स्थापितले उजुरीमाथि बिहीबारसम्म अनुसन्धान गरी कारबाही प्रक्रिया अघि बढाउने बताए ।


नरेन्द्रसिह कार्की