समाचारहरू

निर्वाचन आचारसंहिता लागू भएपछि योजनाहरू सञ्चालन तथा शिलान्यास जस्ता कार्यहरू गर्न नपाइने भए पनि स्थानीय तहका जनप्रतिनिधिहरूले योजना शुभारम्भका कार्यलाई निरन्तरता दिएका छन् ।

विदुर नगरपालिकाका मेयर राजन श्रेष्ठ र उपमेयर प्रभा बोगटीले आचारसंहिता विपरीत आफैं उपस्थित भएर कात्तिक १७ गते बागमती प्रदेश सरकारमातहत पूर्वाधार विकास कार्यालयमार्फत सञ्चालन हुने सडक योजनाको शिलान्यास गराउनु भएको हो ।

मेयर श्रेष्ठ र उपमेयर बोगटीले संयुक्त रुपमा विदुर नपा–१ को बान्द्रे–बोगटीगाउँ–डाँडागाउँ सडक स्तरोन्नतिको शुभारम्भ गराउनु भएको हो ।

उजुरी परेको खण्डमा आचारसंहिताबाट जोगिन भरपर्दो प्रमाण नहोस् भन्ने आशयले व्यानर र शिलालेख नराखी आयोजनाको सूचनापाटी वाचन गरी सडक शिलान्यास गरिएको थियो ।

यस्तै, लिखु गाउँपालिका अध्यक्ष ध्रुव श्रेष्ठले गाउँपालिकाको वडा नं. ५ को भेडाचौरमा स्वास्थ्य इकाईको भवन उद्घाटन गर्नुभएको थियो ।

उक्त उद्घाटनको निर्वाचन अधिकृतको कार्यालयमा उजुरी परेको थियो । उजुरीपछि निर्वाचन अधिकृतको कार्यालयले स्थलगत अनुगमन गर्दा स्वास्थ्य संस्थाको नयाँ भवनबाट हालसालैबाट सेवा सञ्चालन गरिएको पाइएको तर, गाउँपालिका अध्यक्षले उद्घाटन गरेको भरपर्दो प्रमाण फेला नपरेको नुवाकोट क्षेत्र नंं. १ का निर्वाचन अधिकृत टेकराज भुसालले बताउनुभयो ।

नवदीप श्रेष्ठ