समाचारहरू

बाढी पीडितहरूलाई राहत वितरण गर्ने बहानामा दलहरूले गम्भीर रूपमा आचारसंहिता उल्लङ्घन गरिरहँदा पनि निर्वाचन कार्यालयले त्यसलाई रोक्न सकेको छैन ।

स्थानीय तहको तेश्रो चरणको निर्वाचन अन्तर्गत प्रदेश नं २ मा आगामी असोज २ गते निर्वाचन हुन गइरहेको र भदौ १ गतेदेखि प्रदेश नं २ मा निर्वाचन आचारसंहिता लागु भइसकेको छ ।

गत हप्ता आएको अविरल वर्षात्का कारण बाढीले रौतहट जिल्लाका करिव ४ लाख जनसङ्ख्या प्रभावित र हजारौँ नागरिक घरवारविहीन भएपछि वाढीपीडितका लागि बिभिन्न व्यक्ति तथा सङ्घसंस्थाले राहत वितरण गर्दै आइरहेका छन् ।

नेपाल सरकारले राहत वितरणमा एकद्वार प्रणाली लागु गरेपनि विभिन्न राजनीतिक दल तथा तिनका भातृ सङ्गठन तथा दलसँग सम्बन्धित उम्मेदवारहरूले आआफ्नै किसिमबाट राहत वितरण गर्दै आइरहेपनि स्थानीय प्रशासनले यसलाई नियन्त्रण गर्न सकेको छैन ।

खासगरी सत्तामा रहेका दलहरूले राहत वितरणमा पूर्ण रूपमा आचारसंहिताको उल्लङ्घन गर्दै राहत वितरण गरिरहँदा समेत स्थानीय प्रशासनले त्यसलाई रोक्न नसकेको विपक्षी दलले आरोप लगाएको छ ।

भदौ २ गते नेपाली काङ्ग्रेस गौर नगरपालिकाका मेयरका सम्भावित उम्मेदवार धिरेन्द्रप्रसाद सिंहले आफ्नो फोटो समेत राखी व्यानरमा नेपाली काङ्ग्रेसका नेता उल्लेख गरी साविक वडहर्वा गाविसमा राहत वितरण गरेका छन् ।

यसैगरी सिंहले राहतमा वितरण गरेको चामलको बोरामा समेत आफ्नो फोटो र पार्टीको नाम उल्लेख गरेका छन् । सिंह गौर नपाबाट सर्वसम्मत रूपमा नेपाली काङ्ग्रेसको तर्फबाट मेयरमा सिफारिस भएका व्यक्ति हुन् ।

प्रमुख जिल्ला अधिकारी उद्धवबहादुर थापाले त्यसरी राहत वितरण गर्न नपाइने भएपनि स्थानीय प्रशासनलाई कुनै जानकारी नै नदिई राहत वितरण गरिएको हुन सक्ने बताए । उनले भने-'हामीलाई थाहा छैन । हाम्रोमा कसैले उजुरी पनि दिएको छैन ।'

यसैगरी भदौ २ गते नै नेपाली काङ्ग्रेसका नेता रामचन्द्र पौडेल तीनजना मन्त्रीसहित हेलिकप्टरमा रौतहटमा आएर पार्टिको नामबाट राहत वितरण गरिरहेका छन् । नेता पौडेलसँग सिञ्चाई मन्त्री सञ्जय गौतम, कृषि मन्त्री रामकृष्ण यादव र यातायात मन्त्री वीरबहादुर वलायर साथमै रहेका छन् ।

विपीन गौतम