समाचारहरू

आफू निर्वाचित भएको स्थानीय तहमा उम्मेदवारको पक्षमा प्रचारप्रसार गर्न नपाइने प्रावधान भएपनि तनहुँको विभिन्न स्थानीय तहका पदाधिकारीहरू प्रचार प्रसारमा हिँडेका छन् ।

ऋषिङ गाउँपालिकाका अध्यक्ष राजेन्द्रकृष्ण श्रेष्ठ, देवघाट गाउँपालिकाका अध्यक्ष तिलबहादुर थापा र म्याग्दे गाउँपालिकाका उपाध्यक्ष बालकृष्ण घिमिरे उम्मेदवारको प्रचारप्रसारमा हिँडेका हुन् ।

निर्वाचन आचारसंहिता उल्लङ्घन गर्दै स्थानीय तहका अध्यक्ष तथा उपाध्यक्ष आफ्नै स्थानीय तहका विभिन्न ठाउँमा आयोजित कार्यक्रममा पार्टीका उम्मेदवारसँग सहभागी हुन थालेका हुन् ।

निर्वाचन आचारसंहिता २०७९ को दफा ५ बमोजिम स्थानीय तहका पदाधिकारीले आफू बहाल रहेको स्थानीय तहमा प्रचारप्रसारमा गर्न पाइँदैन । तर, अर्को स्थानीय तहमा सरकारी स्रोतसाधनको प्रयोग नगरी प्रचारप्रसारमा हिँड्न भने छुट दिइएको छ ।

उम्मेदवारको प्रचारप्रसारमा हिँडेको बारेमा ऋषिङ गाउँपालिकाका अध्यक्ष राजेन्द्रकृष्ण श्रेष्ठले आफ्नै गाउँ ठाउँमा उम्मेदवार आएपछि केही समय सँगै हिँडेको बताउनु भयो ।

उहाँले अहिले चुनावी प्रचार भन्दा पनि घरदैलो अभियान भएको हुँदा यसले आचारसंहिता उल्लङ्घन नहुने बताउनु भयो ।

जिल्ला निर्वाचन कार्यालयका प्रमुख हरिप्रसाद ढकालले निर्वाचन आचारसंहिताको पुर्ण पालनाको लागि सबै राजनीतिक दल, उम्मेदवार र स्थानीय तहका जनप्रतिनिधिलाई अनुरोध गरिएको बताउनु भयो ।

प्रकाशचन्द्र भट्टराई