आचारसंहिता उल्लङ्घन गरेको आरोपमा दुई जनासँग स्पष्टीकरण

  ०७९ कात्तिक १५ गते

आगामी मङ्सिर ४ गते हुने प्रतिनिसभा सदस्य तथा प्रदेशसभा सदस्य निर्वाचन ०७९ का जारी गरिएको निर्वाचन आचारसंहिता उल्लङ्घन गरेको आरोपमा जिल्ला प्रशासन कार्यालयले दुई जनालाई स्पष्टीकरण सोधेको छ ।

निर्वाचन आचारसंहिता विपरित सामाजिक सञ्जालमा अभिव्यक्ति दिने एक जना र सामाजिक सञ्जालमा कांग्रेसका उम्मेदवारलाई भोट माग्ने एक जना कर्मचारीलाई प्रशासनले स्पष्टीकरण सोधेको छ ।

निर्वाचन क्षेत्र नम्बर १ का उम्मेदवार अम्विरबाबु गुरुङविरूद्ध सामाजिक सञ्जालमा अभिव्यक्ति दिने राष्ट्रिय भूमि आयोग ओखलढुङ्गाका सदस्य नवराज खड्कालाई २४ घण्टे स्पष्टीकरण सोधिएको प्रमुख जिल्ला अधिकारी दिलकुमार तामाङले बताउनु भयो ।

निर्वाचन आचारसंहिता विपरित फेसबुकमा उम्मेदवारविरूद्ध विभिन्न अभिव्यक्ति दिएको आरोपमा खड्कालाई स्पष्टीकरण सोधिएको प्रमुख जिल्ला अधिकारी तामाङले बताउनु भयो ।

खड्काले प्रशासन र निर्वाचन कार्यालयमा स्पष्टकीरण पेश गर्नु भएको प्रमुख जिल्ला अधिकारी तामाङले बताउनु भयो ।

खिजीदेम्बा गाउँपालिकाका कर्मचारी शेरसाङ्गे शेर्पाले कांग्रेस उम्मेदवारका लागि सामाजिक सञ्जाल फेसबुकमार्फत भोट मागे पछि उहाँविरूद्ध कात्तिक ७ गते उजुरी परेपछि स्पष्टीकरण सोधिएको जिल्ला प्रशासन कार्यालयले जनाएको छ ।

स्पष्टीकरण सोधिएका दुवै जनाले आफुहरूले सामाजिक सञ्जालमा राखेको पोष्टहरू हटाउने र आगामी दिनमा आचारसंहिता विपरितका कार्य नगर्ने प्रतिवद्धता जनाएको जिल्ला निर्वाचन कार्यालयका प्रमुख प्रेमप्रसाद न्यौपानेले बताउनु भएको छ ।

जिल्ला प्रशासन कार्यालय, जिल्ला निर्वाचन कार्यालय, मुख्य निर्वाचन अधिकृतको कार्यालय र प्रहरीले सुक्ष्म रूपमा आचारसंहिता पालना भए नभएकोबारे निगरानी गरिरहेको जिल्ला निर्वाचन कार्यालयका प्रमुख न्यौपानेको भनाइ छ ।


सरस्वती बानिया